Teńizden shólmekke salynǵan hat taýyp alǵan Italııa turǵyny ony jazǵan balany izdep tapty

<p>ASTANA. KAZINFORM - Bótelkedegi joldaý... Bul ertegi nemese ánniń ataýy sııaqty estiledi, biraq Italııanyń ońtústigindegi Neapol provıntsııasyna qarasty Bakolı qalasynyń turǵyny Darıo Grande bir kúni jaǵajaıda serýendep júrgende ishine hat salynǵan bótelke tapty, dep jazdy <a href="https://ru.euronews.com/2024/02/28/message-in-a-bottle-by-luca-palama" target="_blank" rel="noopener">Euronews.</a>&nbsp;</p>

«Teńizben erekshe qarym-qatynasym bar, ol menimen sóılesip, jaýap beretin dosym sııaqty. Bul qarym-qatynas mine, 38 jasymda da jalǵasyp jatyr. Búginde men teńizdi eń jaqyn dosym sanaımyn», — deıdi Bakolı turǵyny Darıo Grande.

Teńiz Darıoǵa Ispanııadaǵy Balear araldarynan kútpegen joldaý jiberdi. Hat ıesi — 11 jasar bala ózi jáne hobbıi jaıynda jazǵan. 

Balear araldarynan teńizge laqtyrylǵan bótelke shamamen 2000 teńiz mılin asyp, 4 aıdan keıin osy jaǵajaıǵa shyqty. Internet pen áleýmettik jeli arqyly jyldam jáne ýaqytsha baılanys zamanynda bótelkedegi hat erekshe áser syılaıtyny sózsiz. 

Taǵdyrdyń jazýymen uzaq ta qaýipti sapardan keıin ishine hat salynǵan bótelke onyń mazmunyn baǵalaı bilgen adamnyń qolyna tústi.

«Men jaýapty teńizden jıi izdeımin. Teńiz balanyń haty arqyly maǵan jaýap bergendeı boldy. 11 jasar bala jazǵan hat meni qatty tebirentti», — deıdi Darıo.

Tabylǵan bótelkeniń oqıǵasy ıspan telearnasynda kórsetilip, gazette jazyldy. Darıo balanyń ata-anasymen baılanysqa shyqty.

«Onyń ákesi maǵan alǵys aıtyp qana qoımaı, balasymen qarapaıym poshta arqyly baılanysta bolýdyń mańyzyn atap óti. Men onyń ótinishin qatty qurmetteımin jáne búkil oqıǵanyń máni dál osynda jatyr dep oılaımyn», — deıdi Darıo.

Áleýmettik jelilerdegi vırtýaldy dostardan aıyrmashylyǵy, bótelkege salynǵan hattan bastalǵan dostyq jalǵasýǵa tıis.  

«Jaqyn arada Malorkaǵa baryp, onymen kezdesip, qolyn qysyp, oǵan óz ómirim jáne týǵan jerim týraly aıtyp bergim keledi», — dep josparyn bólisti D. Grande.