«Teńizde» turyp jatqan oqýshylar sabaqty onlaın oqı bastady

<p>ATYRAÝ. KAZINFORM &ndash; Atyraý oblysynyń Jylyoı aýdanynan &laquo;Teńiz&raquo; ken ornyndaǵy vahtalyq qalashyqtaǵy jataqhanalarǵa 7445 adam evakýatsııalandy. Onyń ishinde 3 myńnan astam bala bar. Balalardyń kópshiligi &ndash; mektep oqýshylary.</p>

«Teńizshevroıl» jáne merdiger kompanııalar jylyoılyq turǵyndardyń ómir súrýine qolaıly jaǵdaı týǵyzý, oqýshylardy qashyqtan oqytýdy jalǵastyrý úshin joǵary jyldamdyqty ınternetpen qamtamasyz etip otyr. 

Qulsary qalasynyń turǵyny Nazym Qaldybekova balalarymen birge «Teńizge» 6 sáýirde evakýatsııalanǵan. 

«Osynda evakýatsııalanǵan kezde balalardyń sabaǵyna alańdaǵan edim. Qazir bul másele retteldi. Endi balalarym tańǵy astan keıin sabaq oqýǵa kirisedi. Internettiń jyldamdyǵy joǵary. Balalar oqý baǵdarlamasyn ońaı meńgerý úshin kez kelgen saıtty paıdalana alady», - deıdi Nazym Qaldybekova.

Kópbalaly ana Qyrmyzy Jumaǵalı ken ornyndaǵy jataqhanaǵa 7 sáýirde kelgen. Bes balasynyń úsheýi onlaın bilim alyp jatyr. 

«Balalarymnyń onlaın dáris alýyna barlyq jaǵdaı jasalyp otyr. Sabaqqa qajetti keńse taýarlarymen qamtamasyz etildi. Ústelder balalarǵa yńǵaıly etip jabdyqtalǵan. Bul –balalarǵa qıyn jaǵdaılarǵa qaramastan oqýyn jalǵastyrýyna múmkindik beretin mańyzdy qadam», - deıdi Qyrmyzy Jumaǵalı.

Al, 6-synyp oqýshysy Káýsar Qydyrǵalı Qulsary qalasyndaǵy ıÝ.Gagarın atyndaǵy orta mektepte oqyǵan. Qazir ol synyptastaryn saǵynyp júr. 

«Sabaqty onlaın oqysaq ta ózimdi mektepte júrgendeı sezinemin. Ken orny unady. Ashanadaǵy taǵamdar da dámdi eken. Dostarymyzben kezdesip, serýendeýge ýaqyt taýyp júrmiz», -deıdi Káýsar Qydyrǵalı.

«Aspar Kashagan» JShS-niń jataqhanalarynda úlkendermen birge 200-den astam bala ornalasqan. Olardyń deni – mektep jasyndaǵy oqýshylar. 

«Biz oqýshylardyń kedergisiz bilim alýy úshin qajetti jaǵdaıdy jasap, barlyq qoldaýdy kórsetemiz. Al, mektep jasyna jetpegen balalar úshin eriktilerdiń kómegimen kompanııa aýmaǵynda oıyn-saýyq sharalaryn uıymdastyramyz. Balalar qaýipsizdik pen jaılylyqty sezinip, alańsyz oınaıdy. Serýendeýine múmkindik bar», - deıdi seriktestiktiń óndiristik máseleler jónindegi menedjeri Saltanat Súleımenova.

Eske sala ketelik, budan buryn «Teńizde» turyp jatqan Qulsary turǵyndary barlyq jaǵdaı jasalǵan, biraq qol qýsyryp otyra almaıtynyn aıtqan edi.