«Teńiz» ken ornynan Qara teńizge munaı jetkizetin qubyr tusynda balyq qyryldy

<p>ATYRAÝ. KAZINFORM &ndash; Atyraý oblysyndaǵy &laquo;Teńiz&raquo; ken ornynan Qara teńiz jaǵalaýyna munaı jetkizetin qubyr tusynda balyq qyryldy.</p>

Jaıyq-Kaspıı oblysaralyq basseındik balyq sharýashylyǵy ınspektsııasynyń málimetinshe, Atyraý oblysynyń Jylyoı aýdanyndaǵy «Teńiz-Novorossıısk» munaı qubyrynyń 64-shi jáne 72-shi shaqyrymynda balyq qyrylǵan. Bul derek 7 tamyzda anyqtalǵan.

«Balyqtyń qyrylýy týraly ózara is-qımyl shemasyna sáıkes barlyq múddeli memlekettik organǵa habar berildi. Arnaıy komıssııa músheleri balyq shabaǵy qyrylǵan jerge bardy. Jergilikti atqarýshy organdarmen birge sanıtarlyq normalarǵa sáıkes qyrylǵan balyq shabaqtary jınalyp alyndy. Jınalyp alynǵan shabaqtardyń salmaǵy – 127 kılogramm», - dep habarlady oblysaralyq ınspektsııadan. 

Atyraý oblysy boıynsha ekologııa departamentiniń mamandary zerthanalyq zertteý júrgizý úshin sýdan synamalar aldy. Alaıda, qyrylǵan shabaqtardyń óleksesi túgi qalmaı ydyraǵan. Sol sebepten, balyqtyń qyrylý sebepterin anyqtaý úshin ólekselerden synama alý múmkin bolmaǵan. 

«Balyq shabaqtarynyń qyrylýynyń boljamdy sebebi – sýda otteginiń jetispeýshiligi. Kóktemgi sý tasqyny kezinde Jem ózeni arnasynan asyp tasydy. Sonyń saldarynan shabaqtar ózen sýymen taıaz oıyqtarǵa shyǵyp, jınalyp qalǵan», - dep málim etti oblysaralyq ınspektsııadan. 

Eske sala ketelik, buǵan deıin Atyraý mańyndaǵy kanalda balyq otteginiń jetispeýshiliginen qyrylýy múmkin ekenin habarlaǵan bolatynbyz.