Teńiz kemelerine bir jylda 10,3 mln teńge aıyppul salyndy

<p>Qazaqstan aılaqtarynyń teńiz ákimshiligi kemelerge 231 tekserý júrgizdi, dep habarlaıdy <a href="https://kaz.inform.kz/" target="_blank" rel="noopener">Kazinform</a> Kólik mınıstrligine silteme jasap.&nbsp;</p>

Baqylaý men qadaǵalaýdy júrgizý tıimdiligin arttyrý maqsatynda avtomobıl kóligi jáne kóliktik baqylaý komıteti 2023 jylǵa arnalǵan flottaǵy apattyń aldyn alý jónindegi is-sharalar josparyn ázirlegen bolatyn.

Bul jospar sý kóligindegi qyzmettiń barlyq negizgi baǵyttaryn qamtıdy.

Atap aıtqanda, kemelerdi tekserý, keme qatynasy sý joldaryn tekserý, zańnama talaptaryn buzýshylyqtardyń aldyn alý boıynsha sala sýbektilerimen profılaktıkalyq jumys, qyzmettik flotty paıdalaný.

Atalǵan is-sharalar josparyn iske asyrý úshin Aqtaý, Quryq jáne Baýtıno teńiz porttarynda Komıtettiń aýmaqtyq organy — Qazaqstan porttarynyń teńiz ákimshiligi teńizde júzý qaýipsizdigin qamtamasyz etý maqsatynda teńiz kemelerine 231 tekserý júrgizdi.

Onyń ishinde Qazaqstan týynyń astynda júzetin kemelerde 94 tekserý jáne shet memleket týynyń astynda 137 tekserý boldy.

Onyń nátıjesi boıynsha qaýipsizdik talaptaryn buzý faktilerin joıý boıynsha 19 uıǵarym berildi. 

Keme qatynasynyń qaýipsizdigin qamtamasyz etý maqsatynda kóliktik baqylaýdyń aýmaqtyq ınspektsııalary ózen kemelerine 469 tekserý júrgizdi, sonyń nátıjesinde 47 nusqama berildi.

Elimizde keme qatynasy sý joldarynyń uzyndyǵy — 2104 shaqyrym.

2023 jylǵy navıgatsııaǵa kóliktik baqylaý ınspektsııalary navıgatsııalyq belgilerdiń bar-joǵyn jáne keme júrisiniń kepildi tereńdigin tekserý maqsatynda 5527 km keme qatynasy sý joldaryn qarady.

Shaǵyn kólemdi flottyń qaýipsiz paıdalanylýyn qamtamasyz etý úshin komıtettiń aýmaqtyq organdary shaǵyn kólemdi kemeler boıynsha 3933 tekserý júrgizdi.

Sý kóligindegi baqylaý-qadaǵalaý qyzmetiniń qorytyndysy boıynsha 2023 jyly 944 ákimshilik quqyq buzýshylyq anyqtalyp, 10 mln 336 myń teńge somasyna aıyppul salyndy.