Tennısten Qazaqstan áıelder quramasy álemdik reıtıngte jyldy 9-orynmen qorytyndylady

<p>Halyqaralyq tennıs federatsııasy álemdegi áıelder quramalary arasynda jańartylǵan reıtıngti jarııa etti, dep habarlaıdy <a href="https://kaz.inform.kz/?_gl=1*1kwhfs8*_ga*NzgwMzg1NDY2LjE2OTQ4MzQ5NTM.*_ga_Y44SMVECD5*MTcwMDAwOTY3Mi42NC4wLjE3MDAwMDk2NzIuNjAuMC4w&amp;pk_vid=950730acf4cfe4b61700009675cf80e5" target="_blank" rel="noopener">Kazinform</a>.</p>

Qazaqstan tennıs federatsııasynan málim etkenindeı, komandalyq álem chempıonatynyń qorytyndysymen qazaqstandyq qurama dúnıejúzilik reıtıngte 9-orynǵa jaıǵasty.

Ispanııanyń Sevılıa qalasynda ótken Bıllı Djın Kıng kýboginiń fınaldyq kezeńinde komandalar úsh-úshten tórt topqa bólinip, sheberlik baıqasty. Qazaqstan Slovenııadan qalyp qoıǵanymen, óz tobynda Aýstralııany artqa tastap, ekinshi orynǵa ıe boldy. Sóıtip, úzdik segiz komandanyń qataryna endi. Biraq barlyq quramalardyń kórsetkishterin jáne burynnan jınaǵan upaılaryn eseptegende, qazaqstandyqtar 9-satyǵa turaqtady.

Qazaqstan komandasy Germanııa, Slovakııa, Rýmynııa, Belgııa, Ulybrıtanııa, Polsha sekildi elderdi basyp ozdy.

Qazaqstan áıelder quramasy bıylǵy sáýirde óziniń eń úzdik kórsetkishi – jetinshi orynǵa kóterilgen edi.

Álemdik reıtıngte bıylǵy Bıllı Djın Kıng kýbogin óz tarıhynda alǵash ret jeńip alǵan Kanada kósh bastady. Odan keıin Aýstralııa, Shveıtsarııa, Chehııa, Italııa, Frantsııa, Ispanııa, AQSh, Qazaqstan jáne Germanııa komandalary ornalasty.

Eske sala keteıik, budan buryn qazaqstandyq tóreshiniń HTF arnaıy syılyǵyna ıe bolǵanyn jazǵan edik.

Sondaı-aq Beıbit Juqaev AQSh-taǵy jarysty jeńispen bastady.