ASTANA. KAZINFORM – Búgin Astana qalasynda Devıs kýbogy birinshi álemdik tobynda 1-2 aqpan kúnderi ótetin Qazaqstan – Pákstan pleı-off matchynyń jerebesi tartyldy.
Senbi kúni oıyn shymyldyǵyn Aleksandr Shevchenko ashady. Ol pákstandyq Mýzamıl Mýrtazany synap kóredi.
Odan keıin Beeline Arena ortalyq kortynda Beıbit Juqaev pen Hýzaıfa Abdýl Rehmanǵa kezek keledi.
Jeksenbi kúni Aleksandr Shevchenko – Tımofeı Skatov juptyq synda Akel Han – Mýzamıl Mýrtazamen sheberlik baıqasady.
Sondaı-aq jekeleı synda Aleksandr Shevchenko – Hýzaıfa Abdýl Rehman, Beıbit Juqaev – Mýzamıl Mýrtaza kezdesýleri josparlanǵan.
Qurama kapıtandary básekege bir saǵat qalǵanǵa deıin oıynshylardy almastyra alady.
Matchta úsh utysqa qol jetkizgen komanda jeńimpaz atanady.
Eske sala keteıik, budan buryn Pákstanmen ótetin kezdesýde el namysyn qorǵaıtyn tennısshiler belgili bolǵanyn jazǵan edik.
Ǵaısaǵalı Seıtaq
1980 jyly A. Pýshkın atyndaǵy Oral pedagogıkalyq ınstıtýtyn (M. Ótemisuly atyndaǵy BQÝ) qazaq tili men ádebıeti mamandyǵy boıynsha bitirgen. Tasqala aýdandyq «Ekpin» gazetinde tilshi, bólim meńgerýshisi boldy. Oblystyq «Oral óńiri» gazetinde tilshilikten bas redaktorlyqqa deıingi joldan ótti. «Jaıyq Press» JShS bas dırektorynyń birinshi orynbasary qyzmetin atqardy. 2000 jyldan beri Kazinform halyqaralyq aqparat agenttiginiń BQO-daǵy menshikti tilshisi. Qazaqstan Jazýshylar jáne Jýrnalıster odaǵynyń múshesi. Respýblıkalyq «Jalyn» jýrnaly belgilegen Tólegen Aıbergenov atyndaǵy syılyqtyń (1987) jáne sport jýrnalısteri arasynda Seıdahmet Berdiqulov atyndaǵy syılyqtyń laýreaty (2015). «Eren eńbegi úshin» medaliniń ıegeri. Halyqaralyq «Alash» ádebı syılyǵynyń laýreaty (2024).