Tennısten Devıs kýbogi: Argentınamen matchta Tımofeı Skatov ekinshi jeńisine qol jetkizdi

<p>ASTANA. KAZINFORM &ndash; Rosarıo qalasynda Devıs kýbogi irikteý kezeńi aıasynda Qazaqstan &ndash; Argentına matchy jalǵasýda.</p>

Jarystyń ekinshi kúni juptyq synda Aleksandr Nedovesov – Dmıtrıı Popko argentınalyqtar Maksımo Gonsales – Andres Moltenımen kortqa birinshi bolyp shyqty.
Argentınalyq dýet bir-birine ábden úılesken tennısshiler edi. Sondyqtan olardyń favorıt bolyp sanalýy zańdy bolatyn.

Soǵan qaramastan, birinshi partııada qazaqstandyq jup taı-breıkte sátti oınady – 7:6 (7:3). 

Ekinshi set qarsylastardyń breık almasýymen bastaldy. Sodan keıin qazaqstandyqtar taǵy bir breık jasap, alǵa shyqty – 3:1. Alaıda argentınalyq jup tarazy basyn teńestirip qana qoımaı, setti jeńispen aıaqtady – 6:4.

Olar sheshýshi, úshinshi partııada da 2:0 esebimen alǵa ketti. Aqyry matchty jeńispen túıindedi – 6:0. 

Eki saǵat 40 mınýtqa sozylǵan tartysta básekede Nedovesov – Popko 2 eıs jasap, 5 breık-poınttyń ekeýin paıdalandy. Gonsales – Moltenı 2 eıspen birge 6 breıkke (10 breık-poınt) qol jetkizdi. 

Osylaısha, matchta Argentına 2:1 esebimen alǵa shyqty. 

Budan keıin dúnıejúzilik reıtıngide 278-orynda turǵan Tımofeı Skatov pen álemniń 22-raketkasy Fransısko Serýndolomen sheberlik baıqasty.

Birinshi partııany qarqyndy bastaǵan kort ıesi 3:0 esebimen alǵa ketti. Esep 5:3 bolyp, setke dop bergende, sol múmkindigin paıdalana almady. Taı-breıkte Skatov aıqyn basymdylyq tanytty – 7:6 (7:1).

Ekinshi sette qazaqstandyq tennısshi esepti 4:1-ge jetkizdi. Biraq matchqa dop bergende, Serýndolo qaıyra breık jasap ketti. Degenmen Skatov breıkpen núkte qoıdy – 6:4.
Eki saǵat 2 mınýtqa sozylǵan matchta Skatov 2 eıs jasap, 11 breık-poınttyń úsheýin qur jibermedi. Serýndolo 3 eıs, 2 breıkten (3 breık-poınt) asa almady.

Osylaısha, Tımofeı Skatov erlik jasap, Qazaqstan – Argentına matchynda qos birdeı azýly qarsylasyn jeńip, tarazy basyn qaıta teńestirdi.
Esep – 2:2. Match taǵdyry besinshi kezdesýde sheshiledi.

Eske sala keteıik, budan buryn Devıs kýboginde Qazaqstan – Argentına matchynda Tımofeı Skatov esepti teńestirgenin jazǵan bolatynbyz. 

Sondaı-aq Aleksandr Býblık ekinshi ret Monpele týrnıriniń jeńimpazy atandy.