Tennısten ÁCh: Qazaqstanmen matchta Aýstralııa alǵa shyqty

<p>Ispanııanyń Sevılıa qalasynda Bıllı Djın Kıng kýboginiń fınaldyq kezeńi ótip jatyr, dep habarlaıdy Kazinform.</p>

Qazaqstan áıelder quramasy alǵashqy matchynda ótken jylǵy komandalyq álem chempıonatynyń fınalısi Aýstralııamen kezdesýde.

Búgin ulttyq qurama kóshbasshysy Elena Rybakına densaýlyǵyna baılanysty kortqa shyqpaıtyn boldy.

Bastapqy oıynda dúnıejúzilik reıtıngte 814-orynda turǵan Anna Danılına álemniń 172-raketkasy Storm Hantermen sheberlik baıqasty.

Negizinen juptyq synda óner kórsetetin A.Danılına eki saǵattan astam ýaqytqa sozylǵan tartysty básekede 6:7 (2:7), 4:6 esebimen ese jiberdi.

Osylaısha, Aýstralııa 1:0 esebimen alǵa shyqty. Endi Qazaqstanǵa qalǵan eki oıynda qalaıda jeńý qajet.

Eske sala keteıik, budan buryn Denıs Evseevtyń Helsınkı týrnıriniń ekinshi aınalymyna shyqqanyn jazǵan bolatynbyz.

Aleksandr Nedovesov Bolgarııadaǵy jarystyń shırek fınalyna joldama aldy.