Tennısten ÁCh: Qazaqstan jasóspirimderi shırek fınalǵa bir qadam jetpeı toqtady

<p>Ispanııanyń Kordova qalasynda ótip jatqan Davis Cup Juniors Finals týrnırinde Qazaqstan jasóspirimder quramasy shırek fınalǵa bir qadam jetpeı toqtady, dep habarlaıdy <a href="Kazinform" target="_blank" rel="noopener">Kazinform</a>.</p>

D tobynda sońǵy oıynda qazaqstandyqtar jasóspirimder arasynda komandalyq álem chempıonatynyń alty dúrkin chempıony Ispanııa komandasyna jol berdi.

Birinshi oıynda Zańǵar Nurlanuly Andres Santamarta Roıgten (№ 225) utyldy – 5:7, 3:6.
Esesine Ámir Omarhanov Serhıo Planelıa Ernandesti (№175) 6:4, 6:2 esebimen tize búktirip, tarazy basyn teńestirdi. Osy álem birinshiliginde Ámir birde-bir básekede jeńilgen joq, úsheýinde de qarsylastarynan basym tústi.

Sońǵy juptyq synda ıspanııalyqtar sýper taı-breıkte jeńisti julyp aldy – 2:6, 6:4, 10:5.
Osylaısha, Qazaqstan quramasy myqty komandalar jınalǵan topta úshinshi oryn aldy. Bul 16 jasqa deıingi jasóspirimder úshin Qazaqstan tarıhyndaǵy alǵashqy álem chempıonaty bolǵanyna qaramastan, qazaqstandyqtar laıyqty óner kórsetti.

Eske sala keteıik, budan buryn WTA qorytyndy týrnırinde Elena Rybakınanyń Marııa Sakkarıdi utqanyn jazǵan bolatynbyz.