Tennıs: Prezıdent kýbogynda Denıs Evseev fınalǵa joldama aldy

ASTANA. QazAqparat – Qazaqstandyq, álemniń 412-raketkasy, 30 jastaǵy Denıs Evseev elordada Prezıdent kýbogy úshin ótip jatqan chellendjer týrnıriniń fınalyna joldama aldy, dep habarlaıdy QazAqparat tilshisi.

Jarystyń 3-raketkasy bolyp tirkelgen qazaqstandyq tennısshi jartylaı fınalda reıtıngte 357-orynda turǵan 22 jastaǵy túrkııalyq ıAnkı Erelmen sheberlik baıqasty.

Birinshi partııada Denıs 3:1 esebimen alǵa ketkenimen, túrkııalyq sportshy tarazy basyn teńestirdi. Degenmen esep 4:4 bolǵan mezette Evseev taǵy bir breık jasap, setti aıaqtady – 6:4.

Ekinshi set barysynda qazaqstandyq sportshy eki ret breık jasap, esepti 5:2-ge jetkizdi. Biraq matchqa dop bergende, núkte qoıa almady. Tek ekinshi múmkindigin paıdalana aldy – 6:4.

Saǵat jarymnan astam ýaqytqa sozylǵan básekede Evseev 4 eıs jasap, 10 breık-poınttyń tórteýin qur jibermedi. Qarsylasy 3 eıs, 2 breıkpen (5 breık-poınt) kózge tústi.

Osylaısha, qazaqstandyq sportshy Prezıdent kýbogy úshin dodada ekinshi ret fınalǵa joldama aldy.

Denıs Evseev bas júlde úshin reıtıngte 550-satydaǵy ózbekstandyq Hýmaıýn Sultanovpen talasady. Ol álemniń 570-raketkasy, reseılik Evgenıı Karlovskııdi ońaı utty – 6:3, 6:1.

Eske sala keteıik, budan buryn Prezıdent kýbogynda Denıs Evseevtiń jartylaı fınalǵa joldama alǵanyn jazǵan bolatynbyz.

Prezıdent kýbogynda Mıhaıl Kýkýshkın jartylaı fınaldan tys qaldy.