Tennıs: Qazaqstan jasóspirimder quramasy Aýstralııamen oınaıdy

NUR-SULTAN. QazAqparat – Nıý-Delı (Úndistan) qalasynda ótip jatqan Juniors Billie Jean King Cup irikteý saıystarynyń shırek fınalynda Qazaqstan jasóspirim qyzdar quramasy Aýstralııamen oınaıdy, dep habarlaıdy QazAqparat tilshisi.

Qazaqstan tennıs federatsııasy málim etkenindeı, D tobyndaǵy sońǵy oıynynda qazaqstandyq qyzdar Sıngapýr komandasyn 3:0 esebimen utty.

Sóıtip óz tobynan birinshi orynmen shırek fınalǵa joldama aldy.

Qazaqstandyqtardyń kelesi qarsylasy osal emes. Aýstralııa quramasy jasóspirimder arasynda bes dúrkin álem chempıony atanǵan. Sońǵy ret olar 2011 jyly úzdik shyqqan. Sol kezde onyń quramynda álemniń burynǵy birinshi raketkasy, jekeleı synda «Úlken dýlyǵa» týrnıriniń úsh dúrkin chempıony Eshlı Bartı oınap, óz quramasyna jeńis ápergen.

Eske sala keteıik, budan buryn qazaqstandyq qyzdardyń álem chempıonaty irikteý saıysynyń shırek fınalyna shyqqanyn, Dmıtrıı Popkonyń Portýgalııadaǵy týrnırdi sátti bastaǵanyn jazǵan bolatynbyz.

Sondaı-aq ıÝlııa Pýtıntseva Charlston týrnıriniń ekinshi aınalymyna shyqty.