«Teńizshevroıl» JShS-nyń keńeıý jobasy aıasynda qosymsha 20 myń jumys orny ashylady - QR Munaı jáne gaz mınıstri

ASTANA. 15 qarasha. QazAqparat - Búgin Qazaqstan Respýblıkasy Munaı jáne gaz mınıstri Uzaqbaı Qarabalın men «Teńizshevroıl» JShS bas dırektorynyń mindetin atqarýshy Bred Mıddlton QR Úkimeti men «Teńizshevroıl» JShS arasyndaǵy «Teńizshevroıl» JShS-n keleshekte keńeıtý jobasy men uńǵyma erneýiniń qysymyn basqarý jobasyn júzege asyrý arqyly ınvestıtsııalar tartýǵa, mamandardy oqytýǵa jáne daıarlaýǵa, sondaı-aq jumyspen qamtýǵa járdemdesý maqsatyndaǵy yntymaqtastyq týraly ózara túsinistik memorandýmyna qol qoıdy.

Memorandýmnyń mańyzyna toqtalǵan U. Qarabalın, «Teńizshevroıl» JShS-nyń bolashaqta keńeıý jospary boıynsha elimizde 20 myń qosymsha jumys orny ashylatynyn málimdedi. «Atalǵan memorandým aıasynda TShO-nyń Teńiz ken ornyndaǵy jumys kólemin ulǵaıtý qolǵa alynady. Osy joba aıasynda Teńizdegi munaı óndirý kólemi jylyna 26 mln. tonnadan 38 mln. tonnaǵa deıin ósedi dep josparlap otyrmyz. Bulaı munaı óndirýdi birtindep molaıtý arqyly Qazaqstan ekonomıkasyna eleýli paıda túsiretin bolamyz», - dep atap ótti mınıstr. Sondaı-aq, mınıstrdiń aıtýynsha, bul memorandým qazaqstandyq taraptyń kóptep tartylýyn qamtamasyz etedi. Máselen, jańadan salynyp jatqan ǵımarattarǵa qosymsha 20 myń qazaqstandyq mamandar tartylady. Sonymen qatar, elimizdiń metall qurylǵylaryn jasaýmen aınalysatyn kompanııalarynyń da úlken mólsherde tapsyrystar alý múmkindigi qarastyrylǵan. Aıta ketý kerek, qazirgi ýaqytta keńeıý jumystary josparlaý kezeńinde. Bul úderis jyl sońyna deıin aıaqtalyp, 2014 jyly tolyq qabyldanbaqshy.