Teńizshevroıl, NCOC, KPO kompanııalary Qazaqstan naryǵyna gazdy qanshadan satady

Prezıdent Qasym-Jomart Toqaevtyń «Ádiletti Qazaqstannyń ekonomıkalyq baǵdary» atty Joldaýynda Teńiz, Qarashyǵanaq, Qashaǵan kenishterin ıgerip jatqan munaı-gaz alpaýyttary gazdy ishki naryqqa qoljetimdi baǵamen berý kerektigin aıtqan bolatyn. Energetıka mınıstrligi «QazAqparatqa» osy tapsyrmanyń qalaı iske asyp jatqany týraly málimet usyndy.

«TShO, NKOK jáne QPO-dan gazdy halyqty qoljetimdi úzdiksiz gazben qamtamasyz etý úshin neǵurlym tómen baǵada alǵan tıimdi. Sol sebepti qazirgi tańda osy kompanııalardan satyp alatyn gazdyń baǵasyn tómendetý boıynsha kelissózder júrgizilip jatyr.Joǵaryda kórsetilgen baǵalar tek gazdy TShO, QPO, NKOK-tan satyp alý baǵasy ekenin jáne taýarlyq gazdyń ishki naryqtaǵy shekti kóterme baǵalarynyń quramdas bóligi ǵana ekenin atap ótemiz», - dep jazylǵan mınıstrliktiń redaktsııa salaýyna bergen jaýabynda.

Mınıstrliktiń málimeti boıynsha, «Teńizshevroıl» JShS gazdy ishki naryqqa eki túrli baǵamen satyp otyr. Atyraý oblysyna beriletin gazdyń baǵasy 6,141 teńge/m3 bolsa, ońtústik jáne ortalyq óńirlerge jetkiziletin gazdyń baǵasy 21 teńge/m3.

Al North Caspian Operating Company taýarlyq gazdyń 1000 tekshe metrin 39,38 AQSh dollarmen nemese bir tekshe metrin 18 teńgeden beredi.

«Qarashyǵanaq Petrolıým Opereıtıng» kompanııasy shıki gazdy «QazRosGaz» JShS-nen satyp alyp, Orynbor gaz óńdeý zaýytynda óńdep, taýarlyq gaz retinde ishki naryqqa «QazaqGaz» ulttyq kompanııasy arqyly eki túrli baǵamen satady. Onyń ishinde Batys Qazaqstan oblysyna 1 tekshe metrdi 9,77 teńgege, ońtústik jáne ortalyq óńirlerge 16 teńgege beredi.

«Bul rette «QazRosGaz» JShS-nyń qyzmeti zalaldy ekenin atap ótken jón. «Teńizshevroıl» JShS (budan ári – TShO), Nort Kaspıan Opereıtıng Kompanı (budan ári – NKOK), Qarashyǵanaq Petrolıým Opereıtıng B.v. (budan ári – KPO) kompanııalaryna Qazaqstan Respýblıkasynyń Salyq kodeksine sáıkes arnaıy salyqtyq rejım qoldanylatyndyqtan «Gaz jáne gazben jabdyqtaý týraly» QR Zańyna sáıkes atalǵan kompanııalar óndiretin taýarlyq gazdyń baǵasy rettelmeıdi jáne olardyń baǵasy kelissózder barysynda anyqtalady», - dep jazady vıtse-mınıstr Álibek Jamaýov.