Teńizdi ólkede 604 jańa jumys orny ashylady

ARAL. QazAqparat - Qyzylorda oblysy Aral aýdanynda jumyssyzdyqpen kúres qarqyny toqtamaıdy. Osy jyly «Jumyspen qamtýdyń jol kartasy» baǵdarlamasynyń aıasynda teńizdi ólkede 604 jańa jumys ornyn ashý josparlanýda. Bul jumys kózderi atalǵan baǵdarlama boıynsha bekitilgen 16 joba boıynsha iske aspaq.

Jobany utqan merdigerlermen aradaǵy kelisimshartqa sáıkes, jumysshylardyń keminde 50% jumyspen qamtý ortalyǵy arqyly jiberilý qarastyrylǵan.

Bıyl Aral qalasynda 33 kóshe jóndeledi. Barlyǵy 22 shaqyrymnan asatyn kóshelerdiń qurylysyna respýblıkalyq bıýdjetten 660 mln teńgeden astam qarjy bólingen. Úlken jobaǵa «Aral qurylysy» JShS merdiger bolyp tanylǵan. Qazirgi tańda merdiger mekeme aýdandyq halyqty jumyspen qamtý ortalyǵy arqyly atalǵan jol jóndeý jumystaryna 43 adamdy jumysqa qabyldap úlgergen.

«Búgingi kúni 5 kósheniń astyńǵy qabaty tegistelip jatyr. Qurylys materıaldary daıyn. Aldaǵy aptada asfalt jabyndysyn tóseı bastaımyz. Barlyq jumystar kezeń-kezeńimen ári ýaqytynda bitedi», – deıdi aýdandyq turǵyn úı-kommýnaldyq sharýashylyq, jolaýshylar kóligi jáne avtomobıl joldary bóliminiń basshysy Amantaı Tasqynbaev.

Budan ózge aýdandyq mańyzy bar «Eskiura eldi mekenine kireberis» avtojolynyń qurylysyna 99 mln 452 myń teńge qarjy bólinip, jumys bastalady.

Taǵy qýanatyn jańalyq, aýdan ortalyǵyndaǵy Abaı kóshesin abattandyrý jumysyna respýblıkalyq bıýdjetten 110 mln teńgeden astam qomaqty qarjy bólingen. Bas merdiger - «Naýryz qurylys» JShS. Atalǵan merdiger aýdandyq halyqty jumyspen qamtý ortalyǵy arqyly 14 adamdy jumysqa qabyldap, abattandyrý isin bastap ketken.

Mamyr aıynda aýdan ákimi Muhtar Orazbaevtyń ózi baryp irgetasyn qalaǵan qaladaǵy №2 móltek aýdan aýmaǵyndaǵy 10 turǵyn úıdiń qurylysy qarqyndy júrip jatyr. Mundaǵy ár úı 4 páterden, bir qabattan turady. ıAǵnı salynatyn on úıde 40 páter bolsa, sonyń jartysy - eki bólmeli, al qalǵany - úsh bólmeli páterler.

Úı turǵyzýdaǵy basty maqsat – óz baspanasyna qol jetkizgisi keletin aýdan turǵyndarynyń máselesin sheshý. ıAǵnı, atalǵan jobanyń qarjysy «Turǵyn úı qurylys jınaq bankimen» kelisimshart negizinde oblystyq bıýdjet esebinen bólingen. Jańa baspanaǵa atalǵan bank arqyly kezekte turǵan salymshylar ǵana qol jetkize alady.

Aıta ketý kerek, jańa úılerdi salatyn bas merdigerler – jergilikti «Naýryz qurylys» jáne «Aral sý qurylysy» JShS. Qos merdiger kirisken qurylys jumysyna aýdandyq halyqty jumyspen qamtý bólimi arqyly 50-ge jýyq turǵyndy tartqan.

Turǵyn úıler kúzge deıin bitip, 40 otbasy jańa páterde qonys toıyn toılamaq.