Teńizdegi jobadan bosaıtyndardy jumysqa ornalastyrý jóninde Jol kartasy ázirlendi
Eńbek jáne halyqty áleýmettik qorǵaý mınıstri Tamara Dúısenova «Teńizshevroıl» JShS bazasynda merdigerlik mekemelerdiń qyzmetkerlerin jobadan bosatý jáne jumyspen qamtý máseleleri jóninde keńes ótkizdi. Keńes qorytyndysymen Teńiz ken ornyndaǵy Keleshekte keńeıtý jáne Uńǵyma erneýiniń qysymyn basqarý jobalarynyń qyzmetkerlerin jumystan josparly túrde bosatý jáne olardy jumyspen qamtýdy monıtorıngileý jónindegi is-sharalardyń jol kartasyna qol qoıyldy.
Keńeste Teńiz ken ornyndaǵy jobadan jumysshylardy bosatýdyń boljamdary talqylandy. Sondaı-aq, olardy jumysqa ornalastyrýdyń negizgi tásilderi aıqyndaldy.
«Osy kezge deıin 7,6 myńnan astam qyzmetker jumystan bosatylǵan. Onyń ishinde 1,1 myń jumysshy «Teńizshevroıldyń» ózinde, 449 adam kompanııadan tys jerde jumysqa ornalastyryldy. Elektrondyq eńbek bırjasynda bos jumys oryndary bola tura, jergilikti atqarýshy organdardyń jumystan bosatylǵan qyzmetkerlerin jumysqa ornalastyrý deńgeıiniń tómendigin atap ótkim keledi. Qazir Elektrondyq eńbek bırjasynda 108 myń bos jumys orny bar. Onyń ishinde iske asyrylyp jatqan ulttyq jobalar sheńberinde 10,4 myń bos jumys orny bos tur. Onyń 12 jáne 25%-y –
tehnıkalyq mamandyqtar. Ákimdik jumystan bosatylǵan qyzmetkerlerdi jumysqa ornalastyrý boıynsha jumysty jandandyrýy qajet», -dedi Tamara Dúısenova.
Mınıstrdiń aıtýynsha, Keleshek keńeıtý jáne Uńǵyma erneýiniń qysymyn basqarý jobalarynan jumysshylarynyń jumystan bosatylýyn jáne olardyń jumysqa ornalasýyn monıtorıngileý maqsatynda Jol kartasy ázirlengen. Onda mınıstrliktiń, óńirler ákimdikteriniń TShO-men jáne qosalqy merdiger mekemelermen ózara is-qımylynyń naqty algorıtmi kózdelgen.
«Bul protsestiń barlyq qatysýshylary qazirgi máselelerdi óz deńgeıinde jedel jáne naqty pysyqtaýy óte mańyzdy. Jumystan bosatylǵan kóptegen qyzmetker Atyraý oblysyna basqa óńirlerden kelgen. Sondyqtan TShO-ǵa jumysqa ornalaspaǵandardy ákimdikter jergilikti jerlerde jumyspen qamtýǵa járdemdesý sharalaryna tartýy qajet», -dep atap ótti Tamara Dúısenova.
Atyraý oblysynyń ákimi Serik Shápkenov jumystan bosatylǵan qyzmetkerlerdi jumysqa ornalastyrý boıynsha júrgizilip jatqan jumystar týraly habardar etti.
«Memleket basshysy Qasym-Jomart Toqaev halyqtyń tabysyn arttyrý boıynsha naqty tapsyrmalar berdi. Sol sebepten, TShO men onyń merdiger kompanııalarynan josparly túrde bosatylǵan azamattardy jańa jumyspen qamtý baǵytynda josparlardy júzege asyramyz. Qazir Atyraý oblysynda jańa jumys oryndaryn ashý boıynsha tıisti jumystar júrip jatyr. Óńirdiń keshendi damý jospary aıasynda naqty jobalar qolǵa alynady. Sondyqtan, jumystan bosatylǵan azamattardy osy jańa jobalar aıasynda jumyspen qamtýdy jalǵastyramyz», -dedi Serik Shápkenov.
«Teńizshevroıl» JShS bas dırektory Kevın Laıonnyń pikirinshe, kompanııa jol kartasy boıynsha memlekettik organdarmen birlesip jumys isteýge daıyn. Qazaqstan Keleshek keńeıtý jobasy men Uńǵyma erneýiniń qysymyn basqarý jobasyn iske asyrý kezeńinde mýltıplıkatıvti áser alǵan.
«Bizdiń kompanııa Atyraý oblysynyń ákimdigimen, Energetıka, Eńbek jáne halyqty áleýmettik qorǵaý mınıstrlikterimen birlesken jumysty oń baǵalaıdy. Biz túrli jumystardyń aıaqtalýyna oraı Keleshek keńeıtý jobasy men Uńǵyma erneýiniń qysymyn basqarý jobasyn júzege asyrý barysyna birlese monıtorıng júrgizemiz. Qazir jobanyń 93%-y oryndaldy. Joba bastalǵaly beri TShO jergilikti mamandardy oqytyp, biliktiligin arttyrdy. Bul –bolashaqta eldegi jáne sheteldegi ónerkásip jobalarynda tájirıbesi men bilimin qoldana alatyn qazakstandyq 25 myńnan astam maman. Sondaı-aq, joba halyqaralyq kompanııalarmen seriktestik arqyly tehnologııalardy taratýǵa jáne óńirdegi jańǵyrtylǵan ınfraqurylym túrinde mura qalyptastyrýǵa yqpal etti», deıdi Kevın Laıon.
Taraptar qol qoıǵan Jol kartasynda kózdelgen ózara is-qımyl algorıtmine sáıkes, TShO toqsan saıyn atalǵan mınıstrlikke jáne óńirlerdiń ákimdikterine kásipter men óńirler bólinisinde merdigerlik/qosalqy merdigerlik uıymdar qyzmetkerleriniń jumystan bosatylýy týraly aqparatty usynady. Sondaı-aq Elektrondyq eńbek bırjasyna ornalastyrady.
Al, jergilikti atqarýshy organdar jumystan bosatylǵan qyzmetkerlerdi jumyspen qamtýǵa járdemdesýdiń belsendi sharalaryna tartý boıynsha mindettemelerdi oryndaýy tıis. Onyń ishinde qysqa merzimdi oqýǵa jiberý, sýbsıdııalanatyn jumys oryndaryna jáne Ulttyq jobalar sheńberinde iske asyrylatyn jobalarǵa jumysqa ornalastyrý, granttar men mıkrokredıtter berý bar.
Eńbek jáne halyqty áleýmettik qorǵaý mınıstrligi TShO qyzmetkerlerin jumystan bosatý jáne naqty jumysqa ornalastyrý monıtorıngin júzege asyrady. Jumystan bosatylatyn qyzmetkerler úshin bos jumys oryndarynyń onlaın-jármeńkelerin uıymdastyrady. Jumysynan aıyrylǵan jaǵdaıda memlekettik áleýmettik saqtandyrý qorynan áleýmettik tólem taǵaıyndaýdy qamtamasyz etedi.
Foto: gov.kz