Teńizdegi jarylystan soń 4 myńǵa jýyq jumysshy demalysqa jiberildi
Atyraý oblysynyń Jylyoı aýdanyndaǵy Teńiz ken ornynda 6 shildede jergilikti ýaqytpen saǵat 9:55-te jarylys bolyp, eki adam qaza tapqan edi.
Oblystyq tótenshe jaǵdaılar departamenti qoǵammen baılanys tobynyń málimetinshe, Teńiz ken ornyndaǵy jarylys qubyrdyń flanetsti qosylysynyń úzilýinen bolǵany anyqtalǵan.
«Teńiz ken ornyndaǵy 3-býyn zaýytynyń 42-ýchaskesinde gıdrotest júrgizý kezinde qubyrdyń flanetsti qosyndysy úzilgen. Atalǵan jobany iske asyratyn merdiger kompanııa – «Senimdi Qurylys» JShS-de jumys isteıtin 1985 jylǵy er adam oqıǵa ornynda qaza tapty. Keıin «Teńizshevroıl» JShS-ne qarasty medıtsınalyq klınıkada «Agroprom tehnıka» JShS-niń bir jumysshysy qaıtys boldy. Ekeýiniń de jasy – 37-de», -dep habarlady tótenshe jaǵdaılar departamentiniń qoǵammen baılanys toby.
«Senimdi qurylys» JShS óndiristik qatynastar jónindegi menedjeri Gúlmıra Bapanovanyń málimetinshe, óndiristik nysandaǵy jumys ishinara toqtatylǵan.
Qaıǵyly oqıǵa vahtalyq aýysymnyń aıaqtalýyna eki kún qalǵanda bolǵan.
«Jarylys bolǵannan keıin 4 myńǵa jýyq jumysshy demalysqa jiberildi. Jumysshylarǵa zańǵa sáıkes jalaqy tólenedi. Jarylystyń sebebin anyqtaý úshin «Teńizshevroıl» JShS men oblystyq memlekettik eńbek ınspektsııasy basqarmasynyń qyzmetkerleri kirgen birlesken komıssııa quryldy. Tekserý komıssııasyna qajetti qujattardyń bárin berdik. Jarylystyń sebebi tekserýden soń anyqtalady», -deıdi Gúlmıra Bapanova.
Onyń aıtýyna qaraǵanda, jarylystan qaıtys bolǵan eki jumysshynyń otbasyna materıaldyq qoldaý kórsetiledi.
«Kompanııa marqumdardy sońǵy saparǵa shyǵaryp salýǵa jumsalatyn barlyq materıaldyq shyǵyndy óz moınyna alyp, iri qara mal satyp alýǵa 500 myń teńgeden qarjy aparyp berdi. Marqumdardyń barlyq qaryzdary men nesıelerin jabý, balalarynyń oqý aqysyn tóleý týraly sheshim qabyldandy. Búgin qajetti iri qara mal satyp alýǵa 500 myń teńgeden qarjy aparyp berdik. Aldaǵy ýaqytta bul otbasylarǵa kómektesýdi mindetimizge alamyz», -dep málim etti Gúlmıra Bapanova.
Eske sala ketelik, buǵan deıin Teńiz ken ornynda qaıtys bolǵan eki jumysshynyń nesıesi jabylatynyn habarlaǵan bolatynbyz.