Teńizde jumys isteýge irikteýden ótken qazaqstandyq kompanııalardyń sany belgili boldy

ATYRAÝ. QazAqparat - Teńiz ken ornynyń óndiristik qýatyn keleshekte keńeıtý jobasyna qatysý úshin  qazaqstandyq 1730 kompanııa irikteýden ótti, jobalardyń quny 36,8 mlrd. dollardy quraıdy, dep habarlaıdy QazAqparat tilshisi.

«2016 jyly TShO seriktesteri keleshektegi keńeıtý jobasy - saǵalyq qysymdy basqarý jobasyn (KKJ-SQBJ) qarjylandyrý týraly túpkilikti sheshimdi bekitkendigin málimdedi. Joba Teńiz ken ornynyń óndiristik qýatyn keńeıtýdiń kezekti kezeńi bolyp tabylady. Tıimdilik pen qarjyny únemdeýdi arttyrý maqsatynda KKJ-SQBJ nysandarynyń qurylysy bir mezgilde júzege asyrylatyn bolady. Jańa joba boıynsha, óndiristi jylyna 12 mln. tonnaǵa nemese táýligine 260 myń barrelge deıin ulǵaıtý maqsat etilgen. Osylaısha, jylyna 39 mln. tonnaǵa nemese táýligine 850 myń barrelge jetetin bolady», - delingen «Teńizshevroıl» JShS-nyń habarlamasynda.  

«Joba toby búgingi kúnge jarııalanǵan satyp alýlar boıynsha 346 kelisimshartpen jumystardy 90 paıyzǵa aıaqtady, satyp alýlar salasynda qazaqstandyq kompanııalarǵa basymdyq qamtamasyz etildi. KKJ-SQBJ-nyń qurylysy jáne óndiristik jumystary barysynda 20 myńǵa jýyq jumys ornyn qurý josparlanýda. TShO qazaqstandyq jetkizýshilerdi jobalaý boıynsha qyzmetterdi kórsetýge, satyp alýlarǵa jáne KKJ-SQBJ úshin modýlderdi ázirleýge belsendi jumyldyryp otyr. Búgingi kúni 1730-dan astam kompanııa aldyn ala irikteýden ótti», - dep atap ótti JShS-dan.

Eske salaıyq, 2016 jyly Teńizde shıki munaıdyń óndirisi 27,56 mln. tonna nemese 220 mln. barreldi qurady.