Teńiz jaıaý áskeri qala ishinde urys júrgizý boıynsha jattyqty

NUR-SULTAN. QazAqparat - Aqtaý garnızonynyń «Oımasha» oqý-jattyǵý polıgonynda eldi mekendegi arnaıy áskerı is-qımylǵa daıyndalý jáne ony júrgizý boıynsha jaýyngerlik oq atýdan taktıkalyq oqý-jattyǵý ótti, dep habarlaıdy QazAqparat QR Qorǵanys mınıstrligine silteme jasap.

Oqý-jattyǵý josparyna sáıkes, teńiz jaıaý áskeriniń brıgadasyna eldi mekendi zańsyz qarýlanǵan quramalardan tazartý mindeti júkteldi. Barlaý, tank, artıllerııa, zenıttik, ınjenerlik-saperlik bólimshelerden, sondaı-aq armııanyń avıatsııalyq toptary jáne ushqyshsyz ushý apparattarynyń eseptoptarynan kúsheıtilgen batalondyq taktıkalyq top quryldy. 400-den astam áskerı qyzmetshi tartylyp, 100-ge jýyq qarý-jaraq pen áskerı tehnıka jumyldyryldy.

Teńizshiler shartty jaýyngerlik qoldaný aımaǵyna marsh jasap, aımaqqa tosqaýyl qoıdy. Ushqyshsyz basqarylatyn qurylǵylarmen jasalǵan úzdiksiz barlaý nátıjesi sodyrlardyń kúshteri men quraldarynyń jınalǵan jerin anyqtaýǵa múmkindik berdi.

Sodyrlar berilýden bas tartqan soń, qoldaǵy bar qarýmen olardyń kózin joıdy. Al áskerı qyzmetshiler eldi mekenniń barlyq nysandaryna baqylaý ornatty.

– Qaladaǵy urys - jaýyngerlik is-qımyldyń asa kúrdeli túrleriniń biri. Sondyqtan, iri qalalarda, ıaǵnı adam kóp shoǵyrlanǵan ortada áreket etý úshin áskerlerdi daıarlaý júıesin jetildiremiz. Bul oqý-jattyǵýǵa qatysýshylardyń bári kúrdeli ári tez ózgeretin jaǵdaıda kásibı is-qımyldaǵy eptiligin kórsetti, - dep atap ótti teńiz jaıaý áskerleri brıgadasynyń komandıri, podpolkovnık Jannur Satqynov.

Sondaı-aq, taktıkalyq oqý-jattyǵý barysynda Shekara qyzmeti men Qarýly kúshterdiń bólimsheleri banda quramalary rezervteriniń kirýine jol bermeý úshin memlekettik shekarany kúzetýdi kúsheıtýge qatysty oqý-jaýyngerlik tapsyrmalardy oryndady. Ulttyq ulan men polıtsııa jaqyn mańdaǵy eldi mekenderde soǵys jaǵdaıynda quqyqtyq rejımdi qoldaý jónindegi sharalardy júzege asyrdy. Bul sharalar teńiz jaıaý áskerleriniń belgilengen jaýapkershilik aımaǵynda arnaıy áskerı is-qımyldy nátıjeli ótkizýine septigin tıgizdi.

Aıta keteıik, Memleket basshysy Qasym-Jomart Toqaevtyń kúshtik qurylymdardy tıimdi úılestirýdi qamtamasyz etý, olardyń jedel jáne áskerı-tehnıkalyq úılesimdiligin jolǵa qoıý, sondaı-aq vedomstvoaralyq úılestirýdi kúsheıtý jónindegi tapsyrmalaryn iske asyrý aıasynda «Batyl toıtarys-2022» strategııalyq komandalyq-shtabtyq oqý-jattyǵýy 6 sáýirde bastalǵan bolatyn.