Teńiz túbinen munaı qory tabylmaǵandyqtan «Jeńis» jobasy jabylady - QazMunaıGaz
QMG strategııasy munaı men gazdyń resýrstyq bazasyn kóbeıtýǵa baǵyttalǵan, bul óz kezeginde, kómirsýtek qoryn molaıtý boıynsha uzaqmerzimdi jospardy iske asyrýǵa múmkindik beredi.
Osy maqsatta geologııalyq barlaý jobalary júzege asyrylady, sondaı-aq jumys istep turǵan ken oryndarynda qosymsha barlaý júrgiziledi.
Geologııalyq barlaý salasynda nátıjeni dóp basyp aıtý qıyn.
Burǵylaý qorytyndysy boıynsha kómirsýtek qoryn boljanǵan kórsetkishten tómen bolýy yqtımal, keıde tipti uńǵyma bos bolyp shyǵýy múmkin.
Álemdik statıstıkaǵa sáıkes, boljam deńgeıi 20-30% qurasa, tabysqa jetý ábden múmkin, bul táýekelge baryp, ınvestıtsııa tartýǵa negiz bola alady.
«Jeńis» - geologııalyq barlaý baǵytyndaǵy offshorlyq munaı-gaz jobasy.
Operatory – «Jeńis Opereıtıng» JShS jáne «Lýkoıl Qazaqstan Apstrım» JShS, bul kompanııalardyń jobaǵa qatysý úlesi - 50/50.
Jobaǵa kirispes buryn onyń nátıjeli bolýy 20% deńgeıinde baǵalandy.
Geologııalyq barlaý jumystaryn júrgizý jáne ýchaskeniń ónimdi bolýyn naqtylaý úshin kerrı-qarjylandyrý tetigi boıynsha seriktestiń («Lýkoıl» kompanııasynyń) ınvestıtsııasy tartyldy.
Kerrı-qarjylandyrý degenimiz - geologııalyq barlaý kezeńinde jobaǵa qatysýshy seriktes ınvestıtsııanyń 100%-yn salyp, aldaǵy ýaqytta óndirý esebinen bul shyǵynyn qaıtarady.
Al geologııalyq barlaý kezeńi sátsiz aıaqtalǵan jaǵdaıda jumsalǵan shyǵyn ótelmeıdi.
«Ókinishke qaraı, «Jeńis» qurylymynda izdeý-barlaý uńǵymasyn burǵylaý jumysy nátıjesi bermedi, kómirsýtek qory tabylmady. Geologııalyq boljam rastalmady. Degenmen, geologııalyq burǵylaý jumysynyń nátıjesinde aldaǵy ýaqytta QMG-nyń basqa da jobalaryna qajetti jer qoınaýynyń qurylymy týraly qosymsha aqparat alyndy» dep málimdedi QazMunaıGaz.