Teńiz kenishiniń 23 jumysshysynan koronavırýs indeti anyqtaldy

ATYRAÝ. QazAqparat –Tótenshe jaǵdaı rejımin qamtamasyz etý jónindegi óńirlik jedel shtabtyń málimetinshe, búgin Teńiz kenishiniń 23 jumysshysynan koronavırýs indeti anyqtalǵan, dep habarlaıdy QazAqparat.

«Naýqastar –Teńiz ken ornynan shyǵar aldynda skrınıngten ótken jumysshylar. Qaýipti indetke shaldyqqandardyń barlyǵy ınfektsııalyq statsıonarǵa jatqyzyldy. Olar tıisti hattamalarǵa sáıkes em qabyldaýda. Qazirgi ýaqytta ınfektsııa oshaqtaryna dezınfektsııa jumystary júrgizilip jatyr. Sondaı-aq, naýqastarmen baılanysta bolǵan adamdar anyqtalyp, dárigerlerdiń baqylaýyna alyndy» -dep habarlady óńirlik jedel shtabtan.

Búgin, 20 mamyrda Atyraý oblysynda qaýipti indetti juqtyrǵan adamdar sany 792-ge jetti. Al, Teńiz kenishindegi 42 merdiger mekemeniń qyzmetkerleri arasynda koronavırýs ınfektsııasynyń 712 jaǵdaıy tirkelgen. Vahtalyq aýmaqta qaýiptiń indettiń 22 oshaǵy anyqtalǵan.

Buǵan deıin Teńiz kenishiniń 142 qyzmetkeri koronavırýs juqtyrǵany, sondaı-aq, 3 jumysshysy jansaqtaý bóliminde jatqany habarlanǵan edi.