Teńiz kenishiniń 15 jumysshysynan koronavırýs anyqtaldy
Tótenshe jaǵdaı rejımin qamtamasyz etý jónindegi óńirlik jedel shtabtyń habarlaýynsha, 2 mamyrda tańerteń Jylyoı aýdanynda ornalasqan ken ornynyń 15 jumysshysynan qaýipti indettiń belgisi anyqtalǵan.
«Naýqastardyń arasynda 10 er adam (33, 43, 28, 26, 53, 27, 26, 50, 30, 45 jastaǵy) men 49, 42, 30, 48, 41 jastaǵy 5 áıel bar. Olar Teńiz kenishinde merdiger jáne qosalqy merdiger kompanııalarynda jumys istegen. Bári de osy kezge deıin koronavırýs juqtyrǵan naýqastarmen baılanys jasaǵany úshin karantındik statsıonarda boldy. Olardan zerthanalyq analız alynyp, PTR testileýdiń dıagnostıkalyq zertteýi nátıjesinde koronavırýs ınfektsııasy anyqtaldy», - dep habarlady óńirlik jedel shtabtan.
Qazir naýqastardyń jaǵdaıy qanaǵattanarlyq. Bekitilgen hattamaǵa sáıkes, em qabyldap jatyr. Olarmen baılanysta bolǵandar anyqtalyp, medıtsınalyq baqylaýǵa alyndy. Qaýipti indet oshaqtarynda dezınfektsııalyq jumys júrgizilýde.
Búgin Atyraý oblysynda koronavırýs juqtyrǵandar sany 161-ge jetti. Onyń 97-si Teńiz ken ornynyń jumysshysy.
Eske sala ketelik, 16 sáýirden bastap Teńiz kenishinen shuǵyl emes personaldy shyǵarý bastalǵan bolatyn. 30 sáýirde Teńiz kenishinde koronavırýsqa shaldyqqandarmen baılanysta bolǵan 1,5 myńnan astam jumysshy anyqtalǵan edi.