Teńiz kenishinen shyǵarylǵan jumysshylardyń jalaqysy saqtalady
«Teńizshevroıl» JShS úkimetpen jáne jurtshylyqpen baılanys bóliminiń bas menedjeri Rzabek Artyǵalıevtyń aıtýynsha, Teńiz ken ornynan 18,5 myń jumysshy turǵylyqty mekenjaıyna shyǵarylǵan.
«Vahtalyq tásilmen eńbek etetin qyzmetkerlerdiń koronavırýs ınfektsııasyna baılanysty jumysqa shyǵa almaǵanyna qaramastan, olardyń jalaqysy tolyq saqtalady. Al, ken ornyndaǵy vahtalyq merzimi ýaqytynan asqan jumysshylardyń jalaqysyna 1,5 koeffıtsıent qosylady», - dedi Rzabek Artyǵalıev.
Sondaı-aq, Teńiz kenishindegi ahýaldy turaqtandyrý qatań baqylaýǵa alynǵan. Osyǵan oraı, qyzmetkerlerdi oqshaýlaý, jeke gıgıena erejelerin qamtamasyz etý qatań qadaǵalanady.
«Biz barlyq merdiger mekemeler men jumysshylardan osy sharalardy oryndaýdy talap etemiz. TShO-nyń qaýipsizdik qyzmeti Jylyoı aýdanynyń ákimdigimen, oblystyq taýarlar men kórsetiletin qyzmetterdiń sapasy men qaýipsizdigin baqylaý departamenti jáne ishki ister departamentimen birlesip, Teńiz ken ornyndaǵy talaptardyń oryndalýyn únemi qadaǵalap otyrady. Talaptar saqtalmaǵan jaǵdaıda, TShO kelisimsharttar men eńbek sharttaryn buzyp, qatań sharalar qoldanýǵa quqyly», - dep málimdedi R. Artyǵalıev.