Teńiz kenishinde vahtalyq aýysym ýaqytsha toqtatylady
«Teńizshevroıl» JShS baspasóz qyzmetiniń málimetinshe, negizgi basymdyq –qyzmetkerlerdiń densaýlyǵy men qaýipsizdigin saqtaý.
«Osyǵan baılanysty «Teńizshevroıl» qyzmetkerleri arasynda COVID-19 aýrýynyń taralýyn azaıtý úshin 2021 jyldyń 9 tamyzynan bastap «Teńiz» kenishindegi jedel emes qyzmetkerlerdiń vahtalyq aýysymyn jáne qaıta mobılızatsııasyn ýaqytsha toqtatady.
Atalǵan ýaqytsha sharanyń «Teńiz» kenishinde júrgizilip jatqan josparly jóndeý jumystarymen aınalysatyn qyzmetkerlerge qatysy joq», - dep habarlady seriktestiktiń baspasóz qyzmeti.
«Teńiz» kenishinde vırýstyń taralýyn boldyrmaý úshin COVID-19-ǵa qatysty engizilgen qaýipsizdik sharalary, onyń ishinde qyzmetkerlerdi «bólek jaıǵastyrý» (turǵyn úılerde, kólikte jáne jumys oryndarynda), sondaı-aq PTR-synamasy men oqshaýlaý burynǵysha saqtalatyn bolady.
«Ken ornyna jumysqa tartylǵan jumysshylar arasynda vaktsınalaý baǵdarlamasy jalǵasyp jatyr. Qazir koronavırýs ınfektsııasyna qarsy vaktsınanyń alǵashqy komponentin saldyrǵan qyzmetkerler sany 45 000-nan asty. «Teńizshevroıldyń» óndiristik qyzmeti úzdiksiz jalǵasýda. Kompanııa Keleshek keńeıý-Uńǵy erneýindegi qysymdy basqarý jobasyna baılanysty jumystardy qaýipsiz oryndaýǵa erekshe mán berip otyr», -dep málim etti baspasóz qyzmetinen.
Eske sala ketelik, buǵan deıin Teńiz kenishindegi ınfektsııalyq statsıonarda 440 naýqas
emdelip jatqanyn habarlaǵan bolatynbyz.