Teńiz kenishinde túıirshiktelgen kúkirt shyǵaratyn zaýyt iske qosyldy
Jańa zaýytta aıyna 40 myń tonna túıirshiktelgen kúkirt óndiriledi. Bul joba ekologııalyq qaýipsizdikti jaqsartyp, óndiristik táýekelderdi azaıtady.
«Teńiz kenishiniń túıirshiktelgen kúkirti Afrıka, Eýropa, Qytaı jáne basqa elderdiń naryǵyna eksporttalady. Kúkirtti basqarý jospary aıasynda jergilikti kompanııanyń múmkindigin damytý kózdeldi. Sondyqtan kúkirtti óńdeý qýatyn keńeıtetin joba júzege asyryldy», - deıdi «Teńizshevroıl» JShS bas dırektory Kevın Laıon.
Onyń aıtýynsha, jergilikti kompanııalardy damytý – kompanııanyń negizgi strategııalarynyń biri. Jobany júzege asyrýǵa tartylǵan qazaqstandyq «Caspian Group Construction» JShS eki jylǵa jetpeıtin merzimde jabdyqtardy ornatý men iske qosý jumysyn sátti aıaqtaǵan. Jańa zaýytta jergilikti 60-tan asa adamǵa jumys orny ashylǵan.
«Zaýyt portatıvti jáne ońaı jınalatyn GXM3 qondyrǵysymen jabdyqtaldy. Túıirshiktelgen kúkirt shyǵarý úshin álemdegi eń ozyq tehnologııalar qoldanylyp otyr», - dedi túıirshiktelgen kúkirt zaýytynyń menedjeri Ǵalıasqar Itıshev.