Teńiz ken ornyndaǵy joba jumysynan bosatylatyndardyń arasynda 37 myń qazaqstandyq bar
Jylyoı aýdanynda ornalasqan Teńiz ken ornynda 2016 jyly «Keleshek keńeıý» jobasyn iske asyrý bastalǵan. Bul – elimizde qolǵa alynǵan eń iri jobanyń biri. Osy kezge deıin jobaǵa sáıkes qurylys-montajdaý jumystarynyń 82 paıyzy aıaqtalǵan. Qazir jobada 60 myńǵa jýyq adam jumys isteıdi. Onyń 5 myńy – sheteldik. Al jobadaǵy qazaqstandyq jumysshylardyń 40 paıyzǵa jýyǵyn atyraýlyqtar qurap otyr.
«Qazir «Teńizshevroıl» kompanııasynyń málimetinshe, «Keleshek keńeıý» jobasyndaǵy qurylys-montajdaý jumystarynyń basym bóliginiń aıaqtalýyna baılanysty bıylǵy jyldyń sońyna deıin shamamen 39 myń adamdy bosatý boljanyp otyr. Onyń ishinde Qazaqstan Respýblıkasynyń 37 myń azamaty bar. Jumystan bosatylatyn adamdardyń shamamen 40 paıyzyn Atyraý oblysynyń turǵyndary qurasa, ózgeleri elimiziń basqa óńirlerinde turatyn azamattar. Bul másele oblys ákimdiginiń turaqty baqylaýyna alyndy. Byltyrdan beri jumystan bosatylatyny boljanǵan azamattardy eńbekpen qamtýǵa qatysty tıisti jumystar qolǵa alyndy. Atap aıtqanda, osy máselege jaýapty organdarmen – Enbek jáne halyqty áleýmettik qorǵaý, Energetıka mınıstrlikterimen, sondaı-aq, «Teńizshevroıl» kompanııasy basshylyǵymen aı saıyn kezdesý ótkizilip, aqparattar almasylyp, josparlar pysyqtalyp otyr», - dep habarlady Atyraý oblysy ákiminiń baspasóz qyzmeti.
Belgili bolǵandaı, 2021 jyldyń sońyna deıin joba jumystarynan 2 769 adam bosatylǵan. Onyń ishinde jergilikti 1 228 turǵyn bolǵan. Jumystan bosatylǵan arasynan 785 atyraýlyq turaqty jumysqa ornalastyrylǵan. Basqa jobalarǵa 19 adam aýystyrylyp, 2-eýi oqýǵa jiberilgen. Áleýmettik tólemdi 210 adam alyp otyr. áleýmettik tólemder alýda. A, 212 adam óz múmkindigimen basqa jumys tapqan.
«Bıylǵy І toqsanda 2 900-den astam adam bosatylady dep boljanyp otyr. Onyń ishinde Atyraý oblysynan 1 270 adam bar. Jumystan bosatylatyn adamdardy jumyspen qamtý jumystary pysyqtalyp jatyr. Atyraý oblysynyń ákimdigi óz tarapynan «Eńbek», «Jumyspen qamtýdyń jol kartasy», «Indýstrııalyq-ınnovatsııalyq damý», «Bıznestiń jol kartasy», «Óńirlik damý» jáne ózge de memlekettik baǵdarlamalardy iske asyrý sheńberinde jyl saıyn 12 myńǵa jýyq adamdy jumyspen qamtıdy. Sondaı-aq, oblysta bıyl jáne kelesi jyly iske asyrylatyn iri ınvestıtsııalyq jobalar aıasynda 9 myńǵa jýyq adamdy jumyspen qamtý kózdelgen», -dep málim etti ákimdiktiń baspasóz qyzmeti.
Eske sala ketelik, buǵan deıin Atyraý oblysynda 23 myńǵa jýyq jumys orny ashylatynyn habarlaǵan edik.