Teńiz ken ornyndaǵy vahta qalashyǵynda qoqys konteınerleri órtendi

ATYRAÝ. QazAqparat – Atyraý oblysynda ornalasqan Teńiz ken ornyndaǵy vahtalyq qalashyqta qoqys konteınerlerinen órt shyqty, dep habarlaıdy QazAqparat tilshisi.

Bul derekti «Teńizshevroıl» JShS-niń baspasóz qyzmeti rastady. Qoqys alańyndaǵy órt búgin, 6 shildede tutanǵan.

«Teńiz ken ornynyń óndiristik aımaǵynan tys jerde ornalasqan merdiger kompanııanyń biri – «NefteStroıServıs LTD» JShS-niń vahtalyq qalashyǵy aýmaǵyndaǵy qoqys konteınerleri órtendi. Osyǵan baılanysty «Teńizshevroıl» JShS-niń órt jáne apatty joıý qyzmetiniń qyzmetkerleri oqıǵa ornyna jedel jetti. Órt sóndirýshiler jalyndy oqshaýlap, tez sóndirdi. Zardap shekkender joq», -dep habarlady kompanııanyń baspasóz qyzmeti.

Teńiz – Jylyoı aýdanynyń ortalyǵy Qulsary qalasynan 100 shaqyrymnan astam qashyqtyqta ornalasqan ken orny.

Munda Keleshek keńeıý jáne uńǵy erneýindegi qysym­dy basqarý jobasy iske asyrylyp jatyr.

Jobaǵa qazaqstandyq jáne sheteldik birneshe kompanııa merdigerlikke tartylǵan.

Eske sala ketelik, budan buryn Teńiz kenishinde 5 avtobýstyń órtený sebebi anyqtalǵanyn habarlaǵan bolatynbyz.

«SSER» kompanııasy baspasóz qyzmetiniń málimetinshe, qyzmettik avtobýstar Teńiz vahtalyq qalashyǵyndaǵy turaqqa saǵat 19:00-de kelip, jolaýshylar túsirilgennen keıin qozǵalysty toqtatqan. Turaqqa qoıylǵan avtobýstardyń biriniń motor bóliginen shyqqan órtti «SSER» kompanııasynyń sıgnal berýshi qyzmetkeri baıqaǵan.

Órttiń tez taraýyna sekýndyna 15-20 metr kúshpen soqqan jeldiń ekpini áser etken.