Teńiz ken ornynda jumysshy kóz jumdy
Qaıǵyly oqıǵa keshe, 24 tamyzda saǵat 16:00 shamasynda Jylyoı aýdanyndaǵy Teńiz ken ornynda bolǵan. Bul týraly «Teńizshevroıl» JShS basshylaryna habar berilgen.
Bul derekti Teńiz ken ornyn ıgerip jatqan «Teńizshevroıl» JShS-niń baspasóz qyzmeti rastady.
Teńiz ken orny Jylyoı aýdanynda ornalasqan. Ken orny men aýdan ortalyǵy – Qulsary qalasynyń araqashyqtyǵy shamamen 150 shaqyrymdaı.
«Merdiger mekeme – «Kaztýrboremont» (Intradel Projects) JShS-niń jumysshysy «Órken» vahtalyq qalashyǵynyń qurylys alańynda jumysshy qaıtys bolǵanyn rastaımyz. Jumysshynyń qaıtys bolǵany týraly tıisti memlekettik organdarǵa habarlandy», -dep málim etti kompanııanyń baspasóz qyzmetinen.
Ázirge jumysshynyń qaıtys bolýynyń sebebi aıtylǵan joq. Biraq qurylys alańynda pnevmatıkalyq synaq júrgizilgen.
Qazir qurylys alańyndaǵy jumys toqtatylǵan. Tekserý júrip jatyr.
Jumysshynyń otbasyna kómek kórsetiledi.
Budan buryn Atyraý oblysyndaǵy Teńiz ken ornynda jumysshy asylyp qalǵanyn habarlaǵan edik.
«Senimdi qurylys» JShSniń 28 jastaǵy jumysshysy túngi aýysymǵa shyǵyp, jumys ornynda ózine qol jumsaǵan. Jumysshynyń óli denesin birge jumys isteıtin áriptesteri taýyp alǵan.