Teńiz ken ornynda daýys berýge 10 myńǵa jýyq adamnan ótinish túsken

ATYRAÝ. QazAqparat – Atyraý oblysyndaǵy Teńiz ken ornynda daýys berý úshin 10 myńǵa jýyq adamnan ótinish túsken. Soǵan baılanysty munda 19 kóshpeli beket ashyldy, dep habarlaıdy QazAqparat.

Óńirlik kommýnıkatsııalar qyzmetiniń málimetinshe, referendým komıssııasynyń shtabyna Teńiz ken ornynda vahtalyq jumysqa kelgen 10 myńǵa jýyq adamnan ótinish túsken.

Elimizdiń birneshe óńirinen kelgen jumysshylardyń bir bóligi turǵylyqty tirkelgen mekenjaıyndaǵy ýchaskelik komıssııaǵa júginip, esepten shyǵarý kýáligin ákelgen.

«Jylyoı aýdanyndaǵy Teńiz ken ornynda Qazaqstan Respýblıkasynyń Konstıtýtsııasyna engiziletin ózgerister jónindegi respýblıkalyq referendýmǵa daıyndyq birneshe aptaǵa sozyldy. Referendým ýchaskeleri «Teńizshevroıl» kompanııasy men merdiger uıymdardyń vahtalyq qalashyqtarynda ornalasqan. Daýys berýdi uıymdastyrý úshin qajetti kólik quraldarymen qamtamasyz etilip, qaýipsizdik sharalary kúsheıtildi. Teńiz ken ornynan aýdan ortalyǵy – Qulsary qalasynan baqylaýshylar keldi», -dep habarlady óńirlik kommýnıkatsııalar qyzmeti.

Eske salaıyq, budan buryn Atyraý oblysynda áskerden búgin oralǵan 4 jigit birden daýys berýge kelgenin habarlaǵan edik.