Teńiz ken ornyn keńeıtýmen 100 myń adam aınalysýda

ATYRAÝ. QazAqparat - Teńiz ken ornynda úshinshi zaýyttyń qurylysy bastaldy. Bul sońǵy jyldary bastaý alǵan Qazaqstandaǵy eń iri ınvestıtsııalyq joba. Quny úsh trıllıon teńgeden asady, dep habarlaıdy QazAqparat «Habar 24» telearnasyna silteme jasap.

Qurylys aıaqtalǵan soń ken ornynda munaı óndirýdiń kólemi 12 mıllıon tonnaǵa ósip, jylyna 39 mıllıon tonnaǵa deıin artatyny josparlanǵan. Búginniń ózinde jobanyń el ekonomıkasyndaǵy úles súbeli.

Óndiristi keńeıtýge kirisken ken ornynda búgingi kúni bir mezgilde 50 myń adam jumys isteýde. Olardyń vahtamen jumys isteıtinin eskersek, jumysshylardyń jalpy sany 100 myńǵa jetedi. Jańa zaýyttyń sulbasy qurylys alańynda endi ǵana kórine bastady. Biraq, onyń bireıgeıligi qazirden belgili. Ol jalpy salmaǵy 53 myń tonna jeke modýlderden turady. Olardy Kaspııdegi zaýytqa jetkizý úshin teńiz aılaǵyn salýǵa týra keldi. Ony salý kezinde uzyndyǵy 71 kılometr jáne tereńdigi 5 metrge jýyq kanal qazyldy.

«Qara jáne Baltyq teńizderinen modýlder Reseıdiń ishki sýlary arqyly  Kaspııge túsedi. Barjalardyń eń joǵarǵy júk kótergishtigi 2 myń tonnaǵa jetedi. Modýlder aldymen Prorva portyna, sodan soń Teńizge jetkiziledi», - deıdi Úkimet jáne qoǵammen baılanys jónindegi bas menedjer Rzabek Artyǵalıev.

Joba aıaqtalǵannan keıin port Qazaqstanǵa ótedi jáne Kaspıı teńizindegi taǵy bir tranzıttik habqa aınalady. Ol arqyly astyqty da, metaldy da jóneltýge, Qytaıdan jáne Azııa elderinen Eýropaǵa baǵyttalǵan júkterdi tasymaldaýǵa da qolaıly bolady. 4 jyldan keıin munda munaı óndirý kólemi qazirgi 12 mıllıon tonnadan 39 mıllıonǵa deıin ósedi dep kútilýde.