Teńiz, Qashaǵan,Qarashyǵanaq ken oryndarynan 3,3 mlrd dollar alym-salyq túsken
Bul týraly Energetıka mınıstri Nurlan Noǵaev ortalyq kommýnıkatsııalar qyzmetinde ótken el aldyndaǵy eseptik kezdesýi kezinde aıtty.
«Elimizdiń úsh iri munaı ken orny – Teńiz, Qarashyǵanaq jáne Qashaǵan ken oryndarynda 53,8 mln tonna munaı jáne 44 mlrd tekshe metr gaz óndirildi. Salynǵan ınvestıtsııanyń kólemi – 5,2 mlrd dollar. Mindetti tólemder men salyqtan 3,3 mlrd dollar tústi. Qazirgi tańda bul ken oryndarynda iri jobalar júzege asyrylyp jatyr», - dedi mınıstr.
Sondaı-aq, ol bıyl óndiriletin munaı men kondensat kólemi byltyrǵydan az bolatynyn eskertti.
«Bıylǵy jospar boıynsha álemdegi shekteýlerdi eskere otyryp, 85,3 mln tonna munaı men kondensat óndiremiz dep otyrmyz. Onyń ishinde eksportqa 67,5 mln tonna munaı ónimin shyǵaryp, 17 mln tonnasyn ózimizde óńdep, 12,4 mln tonna munaı ónimin ishki naryqqa joldaımyz», - dedi vedomstvo basshysy.
Onyń aıtýynsha, 2020 jyldyń munaı jáne kondentsat óndirý jospary 90 mln tonna bolǵanymen, jyl qorytyndysy boıynsha 85,7 mln tonna munaı men kondensat óndirilgen. Sonyń 68,6 mln tonnasy eksportqa jóneltilse, 15 mln 800 myń tonna el aýmaǵynda óńdelip, 11,5 mln tonna ónim alynǵan.