Teńiz, Qarashyǵanaq, Qashaǵan ken oryndaryn ıgerýshilermen jasalǵan kelisim qaıta qarala ma

ASTANA. QazAqparat – Energetıka mınıstri Almasadam Sátqalıev Úkimet otyrysynan keıin «Teńiz», «Qarashyǵanaq», «Qashaǵan» ken oryndaryn ıgerip jatqan iri munaı kompanııalarymen jasalǵan kelisimderdi qaıta qaraý máselesi týraly pikir bildirdi, dep habarlaıdy QazAqparat tilshisi.

«QazMunaıGazdyń» menshigindegi munaı kenishteriniń kóp bóliginde ıgerý merzimi aıaqtalyp keledi. ıAǵnı, munaı alýdyń aqyrǵy satysyn ótkerip jatyr. Ondaı kenishterdegi basty mindet – qazirgi ıgerý kólemin saqtap qalý. Úkimet shyǵyndaryn kóbeıtý arqyly jumys oryndaryn saqtap qalýǵa barynsha kúsh salyp jatyr. Ondaı jumys oryndarynyń ózindik quny aıtarlyqtaı qymbat. Bul kenishter ózin-ózi aqtaý úshin salyq jeńildikteri de berilip jatyr», - dedi vedomstvo basshysy.

Onyń paıymynsha, álemde iri ınvestıtsııalarǵa degen suranys órship turǵan kezde eski kelisimderdi qaıta qaraýǵa asyǵýdyń reti joq.

«Bizdiń bıýdjettiń negizgi donory bolyp otyrǵan iri munaı ken oryndary bar. Bul - «Teńiz Shevroıl», «Qarashyǵanaq», «Qashaǵan» sııaqty oryndar. Olardyń kóbinde ıgerýdiń maksımaldy shegine jetip qoıdyq. Bul iri kenishterdi ıgerý máselesi úkimetaralyq, memleketaralyq kelisimder arqyly retteledi jáne ol kelisimderdi oryndaýǵa eki tarap ta jaýapty. Qandaı da bir kelisimderdi qaıta qaraý máselesine kelsek, bul halyqaralyq quqyq alańynda qaralatyn másele. Biz elimizge ınvestıtsııa kelgenin oılaýymyz kerek. Qazir biz ınfraqurylymǵa salatyn ınvestıtsııaǵa barynsha táýeldimiz. Álemde bilikti ınvestorlar tartýda báseke joǵary ekenin, qarjymyzdyń shekteýli ekenin bilesizder. Qazaqstanda nesıeleý mólsherlemesi 20%-dan joǵary ekeni de ınvestıtsııalaý múmkindikterin shekteıdi», - dedi Almasadam Sátqalıev.