Teńiz bıatlonynda QR QK-niń namysyn qorǵaıtyn korablder anyqtaldy
Bul týraly QR QM baspasóz qyzmeti habarlady.
Bıatlonǵa qatysatyn negizgi jáne qosalqy korablder anyqtaldy. «Oral» zymyran-artıllerııalyq korabli negizgi, «Saryarqa» - qosalqy korabl bolyp belgilendi. Korablderdiń ekıpajdary 33 adamnan turady. QR QK Áskerı-teńiz kúshteri bas qolbasshysynyń orynbasary 1-dárejeli kapıtan Sáken Bekjanov bıatlonǵa daıyndyqqa jetekshilik etip, oıyn barysynda aǵa ókil bolady.
Teńizde ekıpajdardyń úılesimdiligin jaqsartý maqsatynda qazirgi ýaqytta korablder oqý-jaýyngerlik jattyǵýlardyń oryndalýyn pysyqtaıdy. Jaǵada jaýyngerlik daıarlyq pánderiniń biri 29011 áskerı bólimi oqý-jattyǵý ortalyǵynyń oqý-jattyqtyrý stansalarynda korabldiń jandylyǵyna kúresý pysyqtalýda.
Korablderdiń reglamenttelgen tehnıkalyq qyzmet kórsetilýi korablderdiń jeke quramy jáne «Zenıt» Oral zaýyty» AQ-tyń ókilderimen ótkiziledi.
Teńiz bıatlonynda Qazaqstan Áskerı-teńiz kúshteriniń komandasynda korablde qyzmet ótkerip júrgen birden-bir áskerı qyzmetshi qyz-kelinshek, «Batyr arýlar - 2016» baıqaýynyń qatysýshysy, «Kaspıı kýbogynyń» úzdik belgi berýshisi ataǵy úshin kúresetin 1-dárejeli starshına Janar Ybyraeva qatysady.
Ótken jyly QR QK ÁTK-niń komandasy «Kaspıı kýbogy» baıqaýyna alǵash ret qatysqanyn esterińizge sala keteıik. Baıqaý qorytyndysy boıynsha komandamyz ekinshi oryndy enshilep, kúmis medaldar jáne «BL-680» tez júretin qaıyqtyń jıyntyǵy ıegeri atanǵan bolatyn.