Tengri Bank-tiń lıtsenzııasynan aıyrylý sebebi anyqtaldy
QR Qarjy naryǵyn retteý jáne damytý agenttiginiń Banktik retteý departamentiniń dırektory Oljas Qızatov Tengri Bank-tegi qandaı jaǵdaılar onyń jumysyn toqtatýǵa ákelip soqqanyn aıtty.
2020 jyldyń basynda bank salymshylar qarajattarynyń aıtarlyqtaı jylystaýyn bastan keshirdi, al naýryz aıynda qarjy ınstıtýty ótimdiliktiń tıisti deńgeıin qamtamasyz etýmen baılanysty problemalarǵa tap boldy. 2020 jyldyń 1 naýryzynan bastap Tengri Bank retteýshiniń prýdentsıaldyq normatıvterin buza otyryp, bank klıentterine qyzmet ete bastady. Nátıjesinde Agenttik banktiń aktsıonerine (PNB) bankti 2020 jyldyń sáýir aıynyń aıaǵyna deıin kapıtaldandyrý týraly qadaǵalaý talabyn jiberdi. Talap oryndalmady.
2020 jylǵy naýryzdan qyrkúıekke deıingi kezeń ishinde Agenttik bank basshylyǵy men aktsıonerlerge qatysty 11 buıryq jáne bir májbúrlep qadaǵalaý sharasyn qabyldady.
«Retteýshiniń qadaǵalaýymen bank nesıelerdi qaıta qarjylandyrý jáne problemalyq nesıelerdi jınaý boıynsha is-sharalar júrgizdi, nátıjesinde banktiń mindettemeleri 26,4 mlrd. teńgege azaıdy, onyń ishinde memlekettik kompanııalar aldyndaǵy qaıtarylǵan mindettemeler 5 mlrd teńge», - deıdi Oljas Qızatov.
Degenmen bul sharalar banktiń qarjylyq jaǵdaıyn durystaýǵa jetkiliksiz boldy.
Onyń aıtýynsha, 2020 jyldyń qyrkúıeginde banktiń qolda bar ótimdiligi 100 mıllıon teńgege jetpegen, al klıenttiń oryndalmaǵan tólemder kólemi shamamen 8 mlrd. teńge bolǵan. Sonymen birge banktiń óz klıentteri aldyndaǵy mindettemeleriniń jalpy kólemi 74 mıllıardtan astam teńgeni qurady.
Ol banktiń tólem qabiletsizdigin, al onyń tıimsiz bıznes modeli jaǵdaıdy turaqtandyrý úshin jetkilikti kiris alýǵa múmkindik bermeıtinin atap ótti. Tengri bank-tiń tólem qabiletsizdigi eń aldymen nesıe portfeliniń sapasynyń tómendigimen baılanysty. Lıtsenzııa qaıtaryp alynǵan kezde nesıelik portfeldiń 84% -y merzimi ótken, 90 kúnnen asqan merzimi ótken nesıeler barlyq nesıelerdiń 62%-yn quraǵan. Agenttiktiń baǵalaýy boıynsha, Tengri Bank nesıeleriniń 58% bank aktsıonerlerimen jáne basshylyǵymen janama baılanysty adamdarǵa berildi jáne is júzinde qaıtarymsyz boldy.
«Qarjy ınstıtýtynyń kúrdeli qarjylyq jaǵdaıyn qazaqstandyq aktsıonerler arasyndaǵy korporatıvti daýlar qıyndatyp, keıinnen olardyń arasyndaǵy sot isine ulasty. Bankte qarajat bolmaǵan kezde jáne aktsıoner Agenttiktiń bankti kapıtaldandyrý jónindegi talabyn uzaq ýaqyt boıy oryndamaǵan jaǵdaıda, Bank prýdentsıaldyq normatıvterdi buzyp, Bank klıentteriniń tólemderi men aqsha aýdarymdaryn oryndamaǵan. Bank basshylyǵy men aktsıonerleri tarapynan týyndaıtyn kúrdeli jaǵdaıdy túzetý múmkindiginiń joqtyǵynan bankti lıtsenzııasynan aıyrý týraly sheshim qabyldandy», - deıdi ol.
Kepildendirilgen ótemaqyny tóleý máselesin jedel sheshý úshin Agenttik Ulttyq bankpen jáne Qazaqstandyq depozıtterge kepildik berý qorymen birge jeke tulǵalardyń depozıtteriniń kóp bóligin eki apta ishinde tóledi.