«Tengri Bank»-tiń 32 myńnan astam salymshysy tıisti tólemdi alýǵa ótinish bermegen

ALMATY. QazAqparat– Kepildik berilgen ótemdi tóleý aıasynda «Tengri Bank» AQ salymshylary jalpy somasy shamamen 14,5 mlrd teńge nemese Qazaqstannyń depozıtterge kepildik berý qory (QDKBQ) mindettemeleriniń jalpy somasynyń 81,5%-yn aldy, dep habarlaıdy QazAqparat tilshisi.

25 qyrkúıekten 19 qazanǵa deıingi kezeńde 4 107 adam nemese barlyq salymshylardyń jalpy sanynyń 11 paıyzy ótem alýǵa ótinish berse, shamamen 32,5 myń adam tıisti tólemdi alýǵa ótinish bermegen. Olardyń ishinde 929 salymshynyń shottarynda, kartochkalary men depozıtterindegi qaldyq somanyń kólemi bir mıllıon teńgeden asatyn bolsa, 1 291 adamnyń – 100 myń teńgeden mılllıon teńgege deıin, 5 723 adamnyń myń teńgeden 100 myń teńgege deıin aqshasy bar.

Osyǵan baılanysty Qazaqstannyń depozıtterge kepildik berý qory «Tengri Bank» AQ salymshylaryna Eýrazııalyq banktiń jeke tulǵalarǵa qyzmet kórsetetin bólimshelerine júginýge keńes beredi. Agent banktiń barlyq qalalardaǵy fılıaldary men bólimsheleriniń mekenjaılary, sondaı-aq olardyń jumys tártibi www.eubank.kz resmı saıtynda qoljetimdi. Ótinish berý merzimi – 2021 jyldyń 30 qyrkúıegine deıin.

Salymshylar kepildik berilgen ótem alýdyń ózderine yńǵaıly kez kelgen tásilin: agent banktiń kassasynan qolma-qol aqshamen, aqshany agent banktegi bank shotyna aýdarý nemese kez kelgen basqa bank arqyly alýdy tańdaýǵa quqyly. Sonymen qatar agent banktiń kartochka shyǵarý jáne ony tegin jetkizýge ótinish berý boıynsha optsııasyn paıdalanýǵa bolady.

Agent bankke júgingen kezde salymshy jeke basyn kýálandyratyn qujat usynyp, tólem alýǵa ótinish toltyrsa, jetkilikti. Ózine tıisti senimhat rásimdelgen basqa adam da salymshynyń ornyna ótinish bere alady.

Eýrazııalyq bank saıtynan kepildik berilgen ótem somalary men bólimshelerdiń jumysbastylyǵyn tekserý boıynsha onlaın-servısterdi paıdalaný arqyly agent bankke kelýdi aldyn ala josparlaýǵa múmkindik bar.

Eske sala ketsek, «Tengri Bank»-te ashylǵan depozıtterinde, aǵymdaǵy jáne kartochkalyq shottarynda aqshasy bar jeke tulǵalar men dara kásipkerler ótem alýǵa ótinish bere alady. Bul rette agent bankte kepildik berilgen maksımaldy soma sheginde barlyq salymshylarǵa aqsha qarastyrylǵan: teńgedegi jınaq depozıtter boıynsha – 15 mln teńgeden; teńgedegi basqa depozıtter boıynsha – 10 mln teńgeden; shetel valıýtasyndaǵy depozıtter boıynsha – valıýta balamasynda 5 mln teńgeden aspaıdy (bank lıtsenzııasynan aıyrylǵan kúni – 18 qyrkúıekte belgilengen valıýta aıyrbastaý baǵamy boıynsha).

Aıta keteıik, zańdy tulǵalardyń depozıtterge mindetti kepildik berý júıesine qatysýshy bankterde, onyń ishinde Tengri Bank» AQ-ta ornalasqan aqshalary QDKBQ kepildigimen ótelmeıdi. Zańdy tulǵalar ótem alý úshin bankti májbúrlep taratý týraly sot sheshimi zańdy kúshine engen soń, banktiń taratý komıssııasyna júgine alady.