Tengri Bank burynǵy basshysy Erjan Shaıkenov 10 jylǵa sottaldy

<p>Tengri Bank klıentteriniń qarjysyn zańsyz paıdalanǵan qyzmetkerlerge sot úkimi shyqty, dep habarlaıdy <a href="https://kaz.inform.kz/" target="_blank" rel="noopener">Kazinform</a>.</p>

Almaty qalalyq sotynan málim etkendeı, 14 sottalýshyǵa eldiń senip tapsyrǵan múlkin ıemdený, bank aqshasyn jymqyrý jáne óz ókilettigin asyra paıdalaný boıynsha aıyp taǵylǵan. 

Sot anyqtaǵandaı, Erjan Shaıkenov bank tóraǵasy bola tura 2015-2020 jyldary 13 adamnan turatyn qylmystyq top qurǵan.

Onyń kómegimen qaryz alýshylardyń tóleý qabiletine qaramastan zańsyz nesıeler rásimdegen.

Osylaısha qarjy uıymyna jalpy somasy 23,5 mlrd teńge zalal keltirgen.

Prokýror sottan Shaıkenovty jáne jeti aıyptalýshyny 9 jyldan 10 jylǵa deıin bas bostandyǵynan aıyrýdy, qalǵan altaýyn 1,5 jylǵa sottaýdy surady.

Sot protsesi barysynda aıyptalýshylar kinásin moıyndaǵan joq.

Tengri Bank-tiń burynǵy basshysy Erjan Shaıkenov 10 jylǵa bas bostandyǵynan aıyryldy.

Dál osyndaı jazany bank tóraǵasynyń eks-orynbasary Baqtııar Іlııasov ta aldy.

Sondaı-aq sot olardyń múlkin tárkilep, qarjy uıymdarynda basshylyq qyzmet atqarýǵa ómir boıyna tyıym saldy.

«Alty adam 8 jylǵa bas bostandyǵynan aıyryldy. Úsheýine bank aqshasyn zańsyz paıdalanǵany úshin kináli dep tanylyp, 1 jyldan 1 jyl 6 aıǵa deıin jyl saıyn 100 saǵat májbúrli jumysqa tartý arqyly bas bostandyǵyn shekteý jazasyna kesildi. Ekeýi eskirý merziminiń ótýine baılanysty qylmystyq jaýapkershilikten bosatyldy. Al, bireýine qatysty is qaıtys bolýyna baılanysty jabyldy», -dep habarlady sottan.

Sot úkimi zańdy kúshine engen joq.

Eske salaıyq, 2020 jyldyń 18 qyrkúıeginde Qarjy naryǵyn retteý jáne damytý agenttigi Tengri Bank-ti bank jáne ózge de operatsııalardy júrgizetin lıtsenzııasynan aıyrǵan bolatyn.

Keıin Tengri Bank-tiń burynǵy menedjerlerine izdeý jarııalandy.

2021 jyly Tengri Bank AQ burynǵy basqarma tóraǵasy Erjan Shaıkenovtyń ustalǵany belgili boldy.