Teńgeniń quldyraýy Ulttyq qordan balalarǵa aýdarylatyn aqshany azaıta ma

<p>ASTANA. KAZINFORM — Ulttyq bank tóraǵasy Tımýr Súleımenov teńge baǵamynyń «Ulttyq qor — balalarǵa» jobasyna áseri qandaı ekenin aıtty.</p>

«Qazir dollardyń teńgege qatysty baǵamy qubylyp tur. Ulttyq qordyń ınvestıtsııalyq kiristiligi de ózgeretin shyǵar. Osyǵan baılanysty balalardyń shotyna jyl qorytyndysy boıynsha túsetin aqshanyń kólemi ózgere me?» — dep surady jýrnalıst kezekti baspasóz máslıhatynda.

Ulttyq bank basshysy «Ulttyq qor — balalarǵa» jobasynyń jınaqtary dollarmen saqtalatyndyqtan valıýta baǵamynyń baǵdarlamaǵa áseri bolmaıtynyn aıtty.

«Birinshiden, Ulttyq qordyń kiristiligi qazir óte jaqsy. Jarty jyldyń ishinde 2,3 mlrd dollar tapty. Dál qazir 4,5 paıyz kiristilikpen 3 mlrd dollarǵa jýyq tabys taýyp otyrmyz. Jalpy Ulttyq qordyń búkil tarıhyn alyp qarasaq, ortasha tabystylyǵy 3 paıyzdan sál artyq. Al bıylǵy jarty jylda kiristilik 4,5 paıyz shamasynda bolyp tur. Ekinshiden, „Ulttyq qor — balalarǵa“ jobasynyń qarajaty dollarmen saqtalyp, dollarmen ınvestıtsııalanady. Sondyqtan ázirge bizge valıýta baǵamynyń qandaı bolatynynda aıyrmashylyq joq. Keler jyldyń basynda baǵam qandaı bolatynyn qaraý kerek. Óıtkeni bıylǵy ınvestıtsııalyq kiristiń teń jartysy bala shottaryna sol kezdegi teńge baǵamy boıynsha taratylady. Bul nomınaldy aýdarym ekenin túsiný kerek. Óıtkeni 18-ge tolmaǵan balalardyń shotyndaǵy aqshany kóbeıte túsý úshin basqara beremiz. Dál qazir baǵamnyń qubylýyna mán bermegen bolar edim. Úkimet bıýdjetke dollar baǵamyn 460 teńge dep saldy. Al ol naqty naryqta 440 teńgege deıin túsip, keıin 480 teńgege deıin kóterildi. ıAǵnı, áýeli 4 paıyz tómen ketip, keıin 4 paıyz kóterildi. Qazir 460-470 teńgeniń dálizine birtindep kele jatyrmyz. Mundaı qubylýǵa men mán bermes edim», — dedi ol.

Ulttyq bank tóraǵasynyń paıymynsha, bul máselede uzaq merzimdegi kiristilikke qaraǵan durys. 

«Mysaly, óz basyma ata-ana retinde Ulttyq qordyń uzaq merzimde durys basqarylǵany, uzaq merzimdegi kiristiligi mańyzdy. Al valıýta baǵamynyń bir aıdyń ishinde ary-beri qubylýy — naryqtyń zańdylyǵy. Buǵan boı úıretý kerek. Óıtkeni tómenge qaraý qubylý bolmasa, joǵary qaraı qubylý da bolmaıdy. Bárimiz balamyz 18-ge tolǵanda jaqsy aqsha alý úshin kiristilik joǵary bolǵanyn qalaımyz. Sondyqtan valıýta baǵamyna qatty mán bermeńizder. Qalaı bolǵanda da biz Ulttyq qordy dollarmen saqtap basqaryp otyrmyz. Eń bastysy, tólem jasalǵan kezde baǵam qandaı bolǵanyn qaraý kerek», — dedi Tımýr Súleımenov.