Teńgedegi depozıtterge ótemaqy alýǵa ótinish berý 2023 jyldyń 1 qańtarynda aıaqtalady

ASTANA. QazAqparat – 2022 jyldyń 23 aqpanyn qosa alǵanǵa deıin ashylǵan teńgedegi depozıtter boıynsha 10% kólemindegi ótemaqy (syıaqy) alýǵa ótinish berý merzimi 2023 jyldyń 1 qańtarynda aıaqtalady. Bul týraly QazAqparat Qazaqstannyń depozıtterge kepildik berý qorynyń baspasóz ortalyǵyna silteme jasap habarlaıdy.

Sońǵy málimetter boıynsha, bankter 284 mlrd teńgege ótinim qabyldady, bul – tólenetin ótemaqynyń yqtımal somasynyń 85%-y.

«Syıaqy alýǵa talaptanǵan salymshylardyń barlyǵy EDB-ge áli ótinish bergen joq. Kóbinese bul – shaǵyn depozıtterdiń ıeleri. Osylaısha, statıstıkalyq málimetterge sáıkes, salymshylardyń jartysynan kóbi (54%) – somasy 10 myń teńgeden az shot ıeleri. Negizinen bul – qarajaty eń tómengi qaldyqqa deıin alynǵan depozıtter. Kólemine qaramastan, baǵdarlama erejelerine sáıkes keletin barlyq depozıtter boıynsha syıaqy esepteletinin atap ótkim keledi», - dedi QDKBQ tóraǵasynyń orynbasary Almaz Qudaıbergenov.

Syıaqy alý úshin salymshy 2023 jyldyń 1 qańtarynan keshiktirmeı depozıti ornalastyrylǵan bankke ótinish berý arqyly kelisimin rastaýy qajet.

«Salymshylardy ótemaqy mólsheri az bolsa da, tólemdi alý quqyǵyn paıdalanýǵa shaqyramyn, sebebi ótinish berý úderisiniń ózi birneshe mınýtty ǵana alady. Bankterdiń kópshiligi bul qyzmetti mobıldi qosymshalarda nemese EDB saıtynda júzege asyrady», - dedi A. Qudaıbergenov.

Ótemaqy tólemderi 2023 jyldyń 23 aqpanynan keıin bastalady. Sondaı-aq, 10% ótemaqy alynýy múmkin eń joǵary soma – 20 mıllıon teńge.