Teńge nege álsiredi - Ulttyq bank túsindirdi

NUR-SULTAN. QazAqparat – Munaıdyń qymbattaýyna qaramastan, teńge baǵamynyń álsireýi jalǵasyp keledi. Bul týraly QR Ulttyq bankiniń tóraǵasy Erbolat Dosaev aıtty, dep habarlaıdy QazAqparat.

«Munaı baǵasynyń bir barrel úshin 84,4 AQSh dollaryna deıin 7,5%-ke ósýine qaramastan, ekonomıkalyq belsendiliktiń qalpyna kelýi men fıskaldyq serpinniń jalǵasýymen qatar ulttyq valıýta bir aıda bir AQSh dollary úshin 427,15 teńgege deıin 0,3%-ke álsiredi», - dedi E. Dosaev Úkimet otyrysynda.

Bıznes pen halyq tarapynan suranystyń ósýi aıasynda Reseı taýarlarynyń ımporty bıylǵy 2-toqsanda jyldyq mánde 1-toqsandaǵy 2,4%-ten 36,1%-ke deıin ulǵaıdy. Bul qazanda teńge baǵamynyń bir rýbl úshin 6,5 teńgege deıin nemese 3,4%-ke álsireýine alyp keldi.

«Sonymen qatar, bazalyq stavkanyń ósýi teńgedegi boryshtyq quraldardyń tartymdylyǵyn saqtaıdy, oǵan beırezıdentterdiń qazanda Qazaqstan Respýblıkasynda memlekettik baǵaly qaǵazdarǵa salymdarynyń 863 mlrd teńgege deıin 75 mlrd teńgege ósýi dálel bolady. Sheteldik ınvestorlar tarapynan shetel valıýtasynyń qosymsha usynysy naryqtyń ótimdiligin jaqsartýǵa jáne suranysty ishinara qanaǵattandyrýǵa yqpal etedi», - dedi Ulttyq bank tóraǵasy.

Onyń aıtýynsha, ımporttyń ósýi aıasynda valıýtaǵa ornyqty suranys, onyń shekteýli usynysy jáne syrtqy naryqtardaǵy qubylmalylyǵy teńge baǵamyna qysym jasaýdy jalǵastyrady.