Teńge depozıtteriniń tamyzdaǵy eń joǵary mólsherlemesi belgili boldy
26 maýsymda QDKBQ Jeke tulǵalardyń jańadan tartylǵan depozıtteri boıynsha eń joǵary syıaqy mólsherlemeleriniń mólsherin anyqtaý jáne bekitý ádistemesine ózgerister engizdi. Soǵan sáıkes depozıtter boıynsha syıaqylardyń joǵarǵy shegi bekitildi. Ol bazalyq mólsherleme men spredtiń qosyndy somasyna teń. Bul ózgerister depozıtterge kepildik berý júıesine qatysýshy banktermen kelisildi.
Jańa engizilim bankterdiń qarjylyq ornyqtylyǵyn saqtaý maqsatynda júıelik táýekelderdi tómendetýge baǵyttalǵan. Bul bankterdiń qor jınaý quny men paıyzdyq shyǵyndarynyń shekten tys ósýine jol bermeı, olardy ońtaıly deńgeıde ustap turýǵa múmkindik beredi. Paıyzdyq shyǵyndardyń shekten tys ósýi nesıe boıynsha paıyzdyq mólsherlemelerdiń joǵarylaýyna ákep soǵatyny belgili.
Sonymen depozıt boıynsha eń joǵary syıaqy mólsherlemesiniń joǵarǵy shegi 14,5 paıyz (bazalyq mólsherleme plıýs 5 p. t.) deńgeıinde bekitildi. Bul depozıtterdiń joǵary tabysyn qamtamasyz etýge múmkindik beredi.
Atap ótý kerek, bankter qarjylyq jáne ekonomıkalyq jaǵdaılarǵa baǵa bere otyryp, depozıtter boıynsha mólsherlemelerdi retteý múmkindigine ıe. Eger ortasha ólshemdi naryqtyq mólsherlemelerdi eskere otyryp eseptelgen eń joǵary syıaqy mólsherlemesi bekitilgen shekten joǵary bolsa, usynylǵan eń joǵary mólsherleme retinde osy bekitilgen shektiń máni qabyldanady.
Tamyzda 12 jáne 24 aıǵa arnalǵan jınaq salymdardyń eń joǵary mólsherlemeleri tolyqtyrýǵa bolatyn túri boıynsha – 12,4 jáne 12,3 paıyzdy, al tolyqtyrylmaıtyn túri boıynsha – 14,5 jáne 14,3 paıyzdy quraıdy.
12 aılyq merzimdi salymdar boıynsha usynylǵan eń joǵary mólsherlemeler burynǵy deńgeıinde qaldy. Eske salamyz, olar ortasha ólshemdi naryqtyq syıaqy mólsherlemeleri negizinde esepteledi. Al 24 aılyq merzimdi salymdar boıynsha mólsherlemeler tómendep, tolyqtyrý quqyǵy bar túri boıynsha – 8,7 paıyz, al tolyqtyrý quqyǵy joq túri boıynsha – 9,5 paıyz bolady.
Bul depozıtterdiń shekti syıqylary da ortasha ólshemdi naryqtyq syıaqy mólsherlemeleri negizinde esepteledi. Osy depozıtter boıynsha mólsherlemelerdiń eleýli túrde tómendeýi bankter tarapynan oǵan degen qyzyǵýshylyqtyń tómendigin jáne ekonomıkalyq turǵydan mólsherlemeni joǵarylatýdyń orynsyz ekendigin kórsetedi.
Tamyz aıynda merzimsiz jáne qysqa merzimdi teńgelik depozıtter boıynsha usynylatyn eń joǵary mólsherlemelerdiń tómendeýi – Qordyń aǵymdaǵy jyldyń mamyr aıynda mólsherlemelerdi birtindep tómendetýdi qolǵa alǵan sharasynyń sońǵy kezeńi. Eske salamyz,
Qor buǵan deıin tómendetilgen bazalyq mólsherlemege qatysty spredti joǵarylatyp, keıinnen birtindep tómendetý týraly sheshim qabyldaǵan bolatyn. Bul shara tómendetilgen bazalyq mólsherleme depozıtterdiń osy sanatyna jáne jalpy depozıt naryǵyna keri áser etpeýi úshin qajet boldy.
Tamyz aıynda teńgedegi merzimsiz depozıtter boıynsha maksımaldy mólsherlemeler jylyna 9,5 paıyz deńgeıinde bekitildi. Bul QR Ulttyq Bankiniń bazalyq mólsherlemesine sáıkes keledi.
Eske salamyz, bazalyq mólsherleme aqshanyń qysqa merzim ishindegi qunyn bildiredi jáne ishki jáne syrtqy ekonomıkalyq faktorlardy eskere otyryp bekitiledi. Tolyqtyrý quqyǵy bar, 3 jáne 6 aıǵa arnalǵan merzimdi depozıtter boıynsha shekti mólsherlemeler – 9,5 paıyzdy, tolyqtyrylmaıtyn túri boıynsha – 10,0 paıyzdy quraıdy.
Osy merzimdegi jınaq salymdardyń tolyqtyrylatyn túrine qatysty shekti mólsherlemeler – 10,5 paıyzdy, tolyqtyrylmaıtyn túri boıynsha – 11,0 paıyz bolady.