Teńge baǵamynyń ózgerýi «QazMunaıGazdyń» damý josparyna ózgeris ákeledi - S.Myńbaev

ASTANA. QazAqparat - Teńge baǵamynyń ózgerýi «QazMunaıGazdyń» bekitilgen bıýdjetine jáne damý josparyna ózgeris ákeledi, biraq geologııalyq barlaý jumystarynyń kólemi sol qalpynda qalady. Bul týraly búgin OKQ brıfıngisinde «QazMunaıGaz» AQ basqarma tóraǵasy Saýat Myńbaev málim etti.

«Ulttyq valıýta baǵamynyń ózgerýi «QazMunaıGazdyń» bekitilgen bıýdjetine jáne damý josparyna ózgeris ákeledi, degenmen geologııalyq barlaý kólemin tómendetýdiń, sonyń ishinde ınfraqurylymdyq nysandardyń qurylysyn kemitýdiń qajettiligin kórip turǵanym joq», - dedi ol.

QMG basshysynyń sózine qaraǵanda, kompanııa teńge baǵamynyń ózgerýinen munaı eksportynda utatyndyǵyn da atap ótti.

«Kompanııanyń ereksheligi nede - biz ónimdi teńgemen óndirip, valıýtamen satamyz. Degenmen bizdiń utylatyn tustar da bar. Bul ishki satylymdarda, sebebi ishki naryqta gazdyń jáne munaı ónimderiniń baǵasy kóterilgen joq», - dedi S. Myńbaev.