Teńge baǵamy naýryzdaǵy turaqsyzdyqtan keıin nyǵaıyp keledi – Ulttyq bank

NUR-SULTAN. QazAqparat – Naýryz aıynyń qorytyndysy boıynsha teńge baǵamy 5,7 %-ǵa nyǵaıyp, bir dollar úshin 467,03 teńge boldy. Bul týraly QR Ultyq bankiniń tóraǵasy Ǵalymjan Pirmatov aıtty, dep habarlaıdy QazAqparat tilshisi.

«Naýryzda bolǵan geosaıası táýekelder men Reseı rýbliniń joǵary qubylmalyǵy teńge baǵamyna qysym jasady. 16 naýryzda teńge baǵamy bırjada 1 dollar úshin 512,17 teńgege jetti», - dedi Ulttyq bank tóraǵasy Úkimettiń búgingi otyrysynda.

Onyń aıtýynsha, qarjylyq turaqtylyq táýekelderin shekteý úshin Ulttyq bank jekelegen kúnderi valıýtalyq ınterventsııalar júrgizdi, olardyń kólemi naýryzda 990,5 mln dollar bolǵan.

«Bıýdjetke beriletin transfertter úshin Ulttyq qordan 891 mln dollardy satýy jáne kvazımemlekettik sektor sýbektileriniń 233,4 mln dollar mólsherinde valıýtalyq túsimderin satýy da teńgege qoldaý kórsetti. Teńge baǵamy naýryzda edáýir qalpyna keldi jáne aı qorytyndysy boıynsha 5,7 %-ǵa nyǵaıyp, 1 dollar úshin 467,03 teńge boldy. Ulttyq valıýta baǵamy sáýirdiń basynda nyǵaıýyn jalǵastyryp, 11 sáýirde 449,63-ti kórsetti», - dep túsindirdi Ǵ. Pirmatov.

Sáýir aıynyń basynda Ulttyq bank teńgeniń nyǵaıý sebepterin ataǵan edi. Ulttyq bank sarapshylarynyń paıymynsha, álemdegi geosaıası jaǵdaı teńge baǵamyna qysqa merzimdik sıpatta áser etedi.