Tenderge qatysty másele quqyqtyq alańda sheshilýi kerek - Almasadam Sátqalıev

ASTANA. QazAqparat – Energetıka mınıstri Almasadam Sátqalıev Úkimet otyrysynan keıin BAQ ókilderine bergen suhbatynda jańaózendik jumysshylardyń «ÓzenMunaıGaz» ótkizgen tenderdiń kúshin joıý» talabyna qatysty pikir bildirdi, dep habarlaıdy QazAqparat tilshisi.

«Qabyldanǵan sharalarǵa baılanysty aıtsaq, men keshe «ÓzenMunaıGaz» ókilderine, «QazMunaıGaz» basshylyǵyna bizdiń mınıstrliktiń ókilderimen birge óz ustanymdaryn munaıshylarǵa túsindirý týraly tikeleı tapsyrma berdim.

Búgin keshegi qyzmetkerlerge qosymsha taǵy da basqa qyzmekterler qosyldy. Qazir talaptary túsiniktirek bola bastady, ıaǵnı «ÓzenMunaıGazdyń» enshiles kompanııasy ótkizgen tenderdiń kúshin joıý talap etilip otyr. Bul jerde jekemenshiktegi qyzmet kórsetýshi kompanııanyń qyzmetkerleri kelgenin túsiný kerek. Ol kompanııa tenderde basqa bir jekemenshiktegi kompanııadan utylyp qalǵan. Bul másele quqyqtyq alańda sheshilýi kerek ekeni túsinikti», - dedi ol.

Mınıstrdiń sózinshe, «Samuryq-Qazyna» kompanııalar toby osy tenderdiń zańdylyǵyna taldaý jasaǵan.

«Maǵan berilgen aqparat boıynsha, «Samuryq-Qazyna» atalǵan tender protsedýrasynyń qanshalyqty durys ótkenin teksergen. «Tender qoldanystaǵy erejege, zańnamaǵa sáıkes ótti» degen qorytyndy shyǵaryldy. Demek, jeńimpaz kompanııa tenderdi zańǵa sáıkes, tómen baǵamen utqan. Onyń ústine, baǵa aıyrmashylyǵy aıtarlyqtaı bolǵan», - deıdi Almasadam Sátqalıev.

Mınıstr sherýde turǵan jumysshylar aldyna oǵan qajettilik bolǵan jaǵdaıda ǵana shyǵatynyn aıtty.

«Keshe dıalog uıymdastyryldy. Bul jumys jalǵasady. Energetıka mınıstrligi tarapynan atalǵan eńbek daýyn sheshýge qajetti múmkin sharalardyń bári qabyldanady.

Munaıshylardyń aldyna ázirge meniń shyǵýymnyń qajettiligin kórip turǵan joqpyn. Ondaı qajettilik bar ekeni aıqyndalsa, shyǵamyn.

«ÓzenMunaıGazdyń» áleýmettik jaýapkershiligi bar ekenin eskersek, bul máseleni sheshý úshin jergilikti ákimdik ókilderimen aldyn ala kelissóz júrgizilgen. Jumysshy mamandyqtaǵy qyzmetkerlerdiń bárine jańa kompanııaǵa osyǵan deıin alǵan aılyqtan kem bolmaıtyn shart boıynsha jumys usynylǵan. Ol jerde aıtarlyqtaı úlken aılyq bolǵan. Kóptegen jumysshy ol usynystan bas tartyp, Energetıka mınıstrliginiń ǵımaratynda pıket jasaý týraly sheshim qabyldady. Áńgimelesemiz. Mınıstrdiń orynbasary, jumysshylardyń quqyǵyn qorǵaýǵa jaýapty ombýdsmen, basqa da sheshim qabyldaýǵa jaýapty tulǵalar kelissózge qatysyp jatyr», - dedi vedomstvo basshysy.

Eske salsaq, «Beraly Mańǵystaý Company» kompanııasynyń burynǵy qyzmetkerleri Astanaǵa kelip, kesheden beri tenderden utylǵan kompanııanyń jumyssyz qalǵan qyzmetkerleriniń máselesin sheshý boıynsha birneshe talap qoıyp jatyr.

Buǵan deıin Energetıka mınıstrliginiń jańaózendik jumysshylar talaptaryna qatysty sheshimin jaqynda jarııalaıtyny málim boldy.