Temirjoldy kesip ótken 28 myńnan astam adam ákimshilik jaýapkershilikke tartyldy

<p>TÚRKІSTAN. KAZINFORM &ndash; Jyl basynan beri 28 589 adam belgilenbegen jerlerdegi temirjoldardy kesip ótken. Al, poıyz astyna túsken 55 adamnyń jartysynan kóbi qaıtys bolǵan. Bul týraly Kóliktegi polıtsııa departamentiniń bastyǵy Baqytjan Malybaev málimdedi.</p>

Jalpy poıyzdar 1 268 ret shuǵyl toqtaýǵa májbúr bolǵan. Onyń 205-i jeke adamdarǵa baılanysty bolsa, 956 jaǵdaı janýarlardyń jolǵa shyǵyp ketýinen bolǵan. Sondaı-aq poıyz astyna túsip ketken 55 adamnyń jartysynan kóbi kóz jumdy.  

«Demalys kúnderi Jetisý oblysy «Qarabulaq-Taldyqorǵan» aralyǵynda júk poıyzy belgilenbegen jerden temirjoldy kesip ótip bara jatqan er adamdy qaǵyp ketti. Ol alǵan jaraqattarynan sol jerde mert boldy. Qylmystyq is qozǵalyp, tergeý júrgizilip jatyr. Ókinishke qaraı qaıǵyly oqıǵalardyń kópshiligi temirjolda júrip-turý erejelerin saqtamaý saldarynan bolady. Áli kúnge deıin adamdar temirjoldyń qanshalyqty qaýipti aımaq ekenin, onyń zardaptaryn jete túsinbeıdi», - dedi polıtsııa polkovnıgi Baqytjan Malybaev.

Kóliktegi polıtseıler turǵyndardy temirjolda qaýipsizdik erejelerin qatań saqtaýǵa shaqyrady. 

«Jaıaý júrginshiler tósem arqyly ótpes buryn temirjolda poıyzdyń, lokomotıvtiń nemese vagondardyń joqtyǵyna ábden kóz jetkizgenderi jón. Tipti, poıyzdyń sıgnalyn estý úshin qulaqqapty sheship ótý óte mańyzdy» - dedi ol.