Temirtaýda tótenshe jaǵdaı rejımi engizildi

<p>ASTANA. KAZINFORM &ndash; Temirtaýda tótenshe jaǵdaı rejımi jarııalandy. Oǵan qalanyń oń jaǵalaýyndaǵy turǵyndardy aýyz sýmen qamtamasyz etetin sý qubyry ýchaskesindegi tehnologııalyq buzylý sebep bolǵan. Jaǵdaıdy sý tasqyny qıyndatyp otyr.&nbsp;</p>

Belgili bolǵandaı, 29 naýryzda «Akva-Treıdıng» JShS kezekshi toby Dý 200 dıýkeriniń (Nura ózeni) zaqymdanǵanyn anyqtady. Oń jaǵalaý baǵytynda sý berý toqtatyldy.

«Qurmetti temirtaýlyqtar, keshe Oń jaǵalaý turǵyndaryn aýyz sýmen qamtamasyz etetin sý qubyrynyń ýchaskesinde oryn alǵan tehnologııalyq buzýshylyqqa baılanysty osy aýmaqqa aýyz sý berýdi ýaqytsha toqtatýǵa májbúr boldyq. Qalyptasqan jaǵdaıdyń barlyq saldaryn eskere otyryp jáne qoldanystaǵy zańnama normalaryn basshylyqqa ala otyryp, tótenshe jaǵdaı jarııaladym. Onyń aıasynda aýyz sýdy tez arada qalypqa keltirý úshin barlyq qajetti sharalardy qabyldaımyz», - dedi Temirtaý qalasynyń ákimi Oraz Taýrbekov.

Temirtaý qalasy ákimdiginiń habarlaýynsha, jóndeý jumystaryn ýchaskeniń ózen arnasynda ornalasýy qıyndatyp otyr. Maýsymdyq sý tasqyny saldarynan jóndeý brıgadalarynyń oǵan qatynaýy da qıyn. 

Qala ákimi aktıvpen Oń jaǵalaýdy sýmen qamtý jaǵdaıy boıynsha jedel keńes ótkizdi. Qalpyna keltirý jumystary kezinde sýmen qamtamasyz etý kestesi kelisildi. Dıspetcherlik qyzmet pen sý tasymaldaýshylar táýlik boıy jumys isteıtin bolady, qosymsha telefon nómirleri berildi. Jalǵyz turatyn azamattarǵa sýdy «Shańyraq» ortalyǵynyń eriktileri jetkizip beredi. 

Dıspetcherlik telefon nómiri: 934555 nemese 87084302541