Temirtaýda boran saldarynan birneshe jerde elektr jelileri úzildi

<p>Temirtaýda aqtútek borannyń saldarynan joǵary voltty elektr jelileri úzilip, qalanyń birneshe úıleri jaryqsyz qaldy. Kommýnaldyq qyzmetter qalpyna keltirý jumystaryn júrgizýde. Biraq jaǵdaıdy aýa raıynyń qolaısyzdyǵy qıyndatýda, dep habarlaıdy Kazinform tilshisi.</p>

Temirtaýda qatty jel men borannyń saldarynan birneshe ýchaskede joǵary voltty elektr berý jelileri úzildi. Jóndeý brıgadalary apatty joıýmen aınalysyp jatyr, biraq aýa raıynyń qolaısyzdyǵy jelilerdi jedel túrde qalpyna keltirýge kedergi keltirýde.

"Qalanyń Shyǵys bóliginde sýyq sý tómen gıdravlıkalyq rejımge aýystyryldy. "Qarmet" AQ sýmen jabdyqtaý tsehynyń sorǵy stantsııalary shtattyq jumys rejımin qalpyna keltirýde", - dep habarlady Temirtaý ákimdigi.

Elektr jelilerindegi apattar JEO-2 jumysyna da áser etti.

"Elektrmen jabdyqtaý jelisiniń qysqa tuıyqtalýyna baılanysty JEO-2 qazandyq agregattary qaıta qosylyp, qaıta jaǵylyp jatyr, sodan keıin olar jelige birtindep qosylady.
Qala ákiminiń basshylyǵymen jedel shtab quryldy, jaǵdaı baqylaýda", - dep tolyqtyrdy ákimdikte.

Qazirgi ýaqytta elektr qýatynsyz qalǵan úılerdiń sany eseptelip jatyr. Kommýnaldyq qyzmetter avarııalyq ýchaskelerde elektr jelilerin qalpyna keltirýge tyrysýda. Aqtútek borannyń saldarynan jóndeý jumystary kúrdelene tústi. Biraq qala basshylyǵıa aqaýlardy múmkindiginshe tez joıýǵa tyrysamyz dep ýáde berip otyr.