Temir torǵa túsken soń bostandyqtyń qadirin túsine bastadym - sottalǵan

<p>QYZYLORDA. KAZINFORM &mdash; Qyzylorda qalasynyń 46 jastaǵy turǵyny 2022 jyly sot úkimimen QR Qylmystyq kodeksiniń 300-babynyń 2-bóliginiń 1 tarmaǵyna sáıkes, (quramynda esirtki zaty bar, ósirýge tyıym salynǵan ósimdikterdi zańsyz egip-ósirý) 3 jylǵa bas bostandyǵynan aırylyp, jazasyn Qyzylordadaǵy túzeý mekemesinde ótegen.</p>

Qyzylorda qalalyq probatsııa qyzmetiniń esebine 2023 jyly qarashada baqylaýǵa alynǵan. Ol bostandyqtyń qadirin temir tordyń artynda otyrǵanda túsingenin aıtady.

«Jastyqpen, bilmestikpen deıin desem, ol kezde 40 jastan asqan aqyl toqtatqan kezim edi. Mańdaıyńa taǵdyr jazsa, qashyp qutyla almaıdy ekensiń. Bas bostandyǵymnan aıyrylyp, temir torǵa toǵytylǵan soń bostandyqtyń qadirin túsine bastadym», — dedi ol.

Buryn sotty bolǵan azamatty túzeý mekemesine aýystyrylǵannan keıin aldymen mekeme qyzmetkerleri qabyldap, zerdeleý jumystaryn júrgizgen. Ol tipti psıhologtyń qabyldaýynda bolypty.

«Mekemeniń ishki kún tártibine baǵynyp, jaza óteý tártibin buzbadym. Ózimniń minezim aqjarqyn, qandaı qıyndyq bolsa da kúlip qarsy alatyn adamnyń qatarynanmyn. Túzeý mekemesinde júrip, sporttyq sharalarǵa, semınar-trenıngterge qalmaı qatysatynmyn. Sonyń nátıjesinde ómirge degen kózqarasym ózgerip, jazamdy ótep, tezirek bostandyqqa shyqsam eken degen arman paıda boldy», — dedi ol.

Jazanyń úshten bir bóligi (bir jarym jyl) ótelgennen keıin, QR Qylmystyq-atqarý kodeksiniń 73-babyna sáıkes, sot qaýlysymen jazanyń ótelmegen bóligi neǵurlym jeńil jaza túrine aýystyrylyp, qalǵan merzimdi probatsııalyq baqylaý belgilenedi. Sóıtip Qyzylorda qalalyq probatsııa qyzmetine tirkeýge alynady.

Qyzylordalyq turǵynnyń sózinshe, túrmege deıin de, onda jazasyn ótep shyqqannan keıin de minezi birqalypty, ózgermegen. Ol qıyndyqqa moıymaýynyń sebebin ózin kútip otyrǵan otbasymen baılanystyrdy.

«Ózimdi salqynqandy, sabyrly ustaımyn, qandaı jaǵdaı bolsa da ýaıymǵa salynbaımyn, artyq qylyǵym joq. Kútip otyrǵan otbasym bar, sondyqtan esh moıymaımyn. Er jigittiń basyna ne kelip, ne ketpeıdi. Otbasym — áıelim, 5 balam bar, 3 balam stýdent, 2 balam oqýshy. Túrmeden shyqqan soń probatsııa qyzmetine tirkeldim. Probatsııa qyzmetkerleri sotpen júktelgen mindetterdi oryndaý, ýaqytyly probatsııa qyzmetine tirkelýge kelý, túnde saǵat 22.00-den keıin belgilengen mekenjaıda bolý keregin, túngi mezgilde qoǵamdyq oryndarǵa barýǵa bolmaıtynyn túsindirdi», — deıdi ol.

Keıipkerimiz temir tordan shyqqannan keıin tipti jeke kásibin qolǵa alypty.

«Probatsııa qyzmetkerlerine óz kásibimdi ashý týraly nıetimdi aıttym. Qyzmetkerler quqyqtyq kómek berip, qujattardy jınaqtaýǵa kómek kórsetti. Ótinish jazyp, tapsyrdym. Mal sharýashylyǵymen aınalyssam degen nıettemin. Mal basyn kóbeıtip, bordaqylaý ortalyǵyn ashsam degen armanym bar. Qazir jaǵdaıym jaqsy, túzeý mekemesi qyzmetkerleriniń jáne probatsııa qyzmetkerleriniń zańǵa sáıkes júrgizilgen kómekteriniń arqasynda túzelý jolyna nyq turdym», — deıdi eseptegi azamat.

Degenmen 46 jastaǵy azamat túrmeden shyqqan adamdy bári birdeı jaqsy qarsy ala bermeıtinin jasyrmady.

«Túrmeden shyqqan adamdy kim jaqsy qarsy alsyn. Otbasym, anam, baýyrlarym jyly qabyldady. Bul da bir synaq shyǵar. Týǵan-týystardyń toıyna baryp turamyn. Temir torǵa tústim dep ómirden túńilip ketpedim. Men ómirden túńilsem, balalaryma, otbasyma kim bas-kóz bolady? Ómir bolǵan soń „jańylmaıtyn jaq, súrinbeıtin tuıaq joq“ demekshi, óz-ózimdi jigerlendirip, qaıta ómirge degen qulshynysym artty», — deıdi ol.

Qyzylordalyq azamat túrmede adamnyń qaı baǵytty tańdaıtynyn ózi sheshetinin jetkizdi. Sondyqtan da túrme adamdy buzady nemese túzeıdi dep dóp basyp aıtý múmkin emes.

«Túrmeden adam túzelip shyǵyp-shyqpaýy ózine baılanysty. Árkim óz ómiriniń sýretshisi ǵoı. Túrmede tártip bolsa, adam túzeledi. Túzeý mekemesinde de psıhologtar, mamandar jumys isteıdi. Jaza basqan adamdy qaıta qoǵamǵa beıimdeýge barynsha jumys júrgizedi. Meniń bolashaqqa maqsatym da, josparym da kóp», — dep qorytyndylady ol.