Temirjoldarda josparly jóndeý bastaldy: Jolaýshy poıyzdary keshigýi múmkin

ASTANA. QazAqparat – Temirjol boıyndaǵy josparly jóndeý jumystaryna baılanysty jolaýshy poıyzdarynyń jyldamdyǵy baıaýlap, belgilengen kestesinen keshigýi múmkin. QazAqparat bul týraly «Qazaqstan temir joly» (QTJ) kompanııasynyń málimetine silteme jasap habarlaıdy.

Infraqurylymdy jańǵyrtý jáne aǵymdaǵy kútip ustaý boıynsha josparly jumystardy júrgizý úshin QTJ poıyzdar qozǵalysy jyldamdyǵyna ýaqytsha shekteý engizip otyr. Bul jolaýshylar jáne júk poıyzdarynyń qozǵalys kestesine áser etedi. Atap aıtqanda, Astana – Almaty, Almaty – Petropavl, Shymkent – Astana, Jezqazǵan – Almaty, Almaty – Oral qatynasyndaǵy poıyzdar keshigýi múmkin.

«Kompanııa týyndaǵan qolaısyzdyqtar úshin jolaýshylardan keshirim suraıdy jáne qazirgi jaǵdaıǵa túsinistikpen qaraýǵa shaqyrady. «QTJ» UK» AQ-da jappaı jóndeý jumystaryn júrgizý jaǵdaıynda jolaýshylar poıyzdary qozǵalysynyń normatıvtik kestesin saqtaý boıynsha táýlik boıy sharalar qabyldanýda», - delingen kompanııa habarlamasynda.

Aıta keteıik, bııyl QTJ 1,1 myń shaqyrymnan astam joldy qalpyna keltirýdi josparlap otyr. 108 myńnan astam shpal men 634 baǵyttamalyq burma jıyntyǵy aýystyrylatyn bolady.

Jóndeý jumystary táýlik boıy júrgiziledi.

Aýqymdy jumystar Atyraý, Aqtóbe, Qyzylorda, Qostanaı, Pavlodar, Semeı jáne Almaty óńirlerinde bastalyp ketti.

Keshendi jóndeý jumystary Moıynty – Qaraǵandy – Astana ýchaskesinde de júrgizilip jatyr.

«Munda kóp ter tógýdi qajet etetin jóndeý kezeńi – lastanǵan ballasty tereń tazartý, eski temirbeton shpaldaryn aýystyrý, relsti torlardyń tutastyǵyn qalpyna keltirý jáne taǵy basqasy júzege asyrylýda. Jambyl magıstraldyq jeli bólimshesiniń ýchaskelerinde joldy kúrdeli jáne kúsheıtilgen ortasha jóndeý aıaqtaldy».

Jolaýshylar poıyzdarynyń qozǵalys kestesi boıynsha aqparatty «1433» tegin nómiri jáne «KTZH_PP_BOT» Telegram-boty arqyly alýǵa bolady.