Temirjol kóligindegi qozǵalys qaýipsizdigin arttyrýǵa qatysty túzetýler engiziledi
Bul týraly Májiliste zańnamalyq aktilerge kólik máseleleri boıynsha ózgerister engizý týraly zań jobasyn tanystyrý kezinde QR Indýstrııa jáne ınfraqurylymdyq damý vıtse-mınıstri Berik Kamalıev aıtty, dep habarlaıdy QazAqparat tilshisi.
«Birqatar túzetý temirjol jáne sý kóligindegi qozǵalys qaýipsizdigin arttyrýǵa baǵyttalǵan. Qazirgi ýaqytta temirjol kóligindegi apattar men avarııalardy tergeýdi kólik salasyndaǵy ýákiletti organ, al oqıǵalar men kólik qaqtyǵysty tasymaldaý protsesine qatysýshylardyń ózderi júrgizedi.
Adamdardyń ómiri men densaýlyǵynyń qundylyǵyn eskere otyryp, zań jobasy aıasynda jolaýshylar poıyzdarynyń jyljymaly quramynyń túsýine nemese soqtyǵysýyna ákelgen oqıǵalardy tekserýdi ýákiletti organnyń quzyretine berý usynylady. Sondaı-aq, ýákiletti organnyń quzyretine Kaspıı teńiziniń aýmaqtyq sýlarynda Qazaqstan Respýblıkasy Memlekettik týy astynda júzetin kemelerge qatysty bolǵan avarııalyq jaǵdaılardy tergeýdi qosý usynylady», -dedi vıtse-mınıstr zań jobasyn tanystyrý kezinde.
Budan buryn habarlanǵandaı, júkterdi avtomobılmen tasymaldaýdyń joǵary qarqyndylyǵy jol tóseminiń merziminen buryn buzylýyna jol bermeý boıynsha túbegeıli sharalardy qabyldaýdy talap etedi.
Joldarda kólik quraldarynyń salmaqtyq jáne gabarıttik parametrlerin ólsheıtin avtomattandyrylǵan stantsııalardy ornatý josparlanýda. Zań jobasynda ólsheý stantsııalaryn ornatý jáne olardyń jumys isteý tártibin aıqyndaıtyn normalar kózdelgen.