Temirjol arqyly kómir tasymaldaý tarıfi óse me – QTJ jaýaby

NUR-SULTAN. QazAqparat – Bıyl elimizde kómir tasymaldaýda temirjol tarıfi qandaı jáne baǵa ózgerýi múmkin be? Bul suraqqa «Qazaqstan temir joly «Júk tasymaly» JShS bas dırektorynyń orynbasary Qanat Kóbesov jaýap berdi, dep habarlaıdy QazAqparat tilshisi.

«Kómir tasymaly boıynsha temirjol tarıfine qatysty aıtarym, baǵanyń ósýi bolǵan joq jáne jyl sońyna deıin baǵany ózgertý josparlanbaǵan. Sondaı-aq, basqa júktermen salystyrǵanda kómir tasymaldaý tarıfiniń eń tómen ekenin aıtqym keledi. Mysaly, kómirdi tasymaldaý baǵasy qara metaldy tasymaldaýmen salystyrǵanda 5 ese tómen, qara metall synyqtary boıynsha 4 ese jáne orman júkterinen 2,5 esege arzan», - dedi Qanat Kóbesov «Samuryq-Qazyna» AQ alańynda onlaın ótken baspasóz máslıhatynda.

Onyń aıtýynsha, el ishinde kómir tasymaldaýdaǵy kólik shyǵyny orta eseppen 8 paıyzdy quraıdy.

Odan bólek, spıker kómir tasymaldaıtyn temirjol vagondaryna qatysty málimetpen bólisti.

«Búginde QR temirjol jelisinde ashyq vagondar parki jetkilikti. El aýmaǵynda 64 myńnan astam ashyq vagon bar, olardyń 55% qatty otyndy tasymaldaýǵa tartylǵan. Onyń ishinde 21 myńnan astam ashyq vagon bizdiń kompanııanyń enshilesi «Qaztemirtrans» AQ-ǵa tıesili, ol vagondardyń 66% kómir tasymaldap jatyr», - deıdi ol.

Buǵan deıin habarlaǵanymyzdaı, elimizde kómir tasymalyn baqylaıtyn monıtorıngilik top quryldy.