Temirjol aqaýy týraly habar beretin ınternet-portal ashylady - QTJ

ASTANA. QazAqparat - «Qazaqstan temir joly» ulttyq kompanııasy temirjoldaǵy qaýipsizdikti arttyratyn arnaıy ınternet-saıtty iske qosady, dep habarlaıdy QazAqparat tilshisi.

Onda jolaýshylar temirjoldaǵy aqaý týraly habar qaldyra alady.

«Eń aldymen qaýipsizdik» dep atalatyn portal bizge jetpeı jatqan aqparatty jedel habarlaıtyn, qozǵalys qaýipsizdigin arttyratyn alańǵa aınalady. Onda temirjolshylar ǵana emes, kez kelgen adam pikir qaldyra alady», - dedi «Qazaqstan temir joly» UK» AQ Qozǵalys qaýipsizdigi departamentiniń dırektory Marat Shákenov Astanada ótken baspasóz máslıhatynda.

Onyń aıtýynsha, 2018 jyly temirjoldaǵy qaýipsizdik erejesin buzý oqıǵalary 2017 jylmen salystyrǵanda 29% azaıǵan.

«2017 jyly 248 oqıǵa tirkelse, 2018 jyly 176 oqıǵaǵa azaıǵan. Bul - temirjoldy jańartýdyń, qozǵalys quramyna kútim jasaýdyń jáne kompanııanyń qurylymdyq bólimsheleriniń maqsatty jumystarynyń nátıjesi», - dedi M. Shákenov.

Aıta keteıik, «Qazaqstan temir joly» ulttyq kompanııasy temirjoldaǵy tótenshe oqıǵa derekterimen bólisken bolatyn.